24 сакавіка, Мінск /Кар. БЕЛТА/. Новы цэнтр транспланталогіі дасць магчымасць скараціць тэрміны чакання на перасадку органаў. Такім меркаваннем падзяліўся кіраўнік Рэспубліканскага навукова-практычнага цэнтра трансплантацыі органаў і тканак Алег Румо ў перадачы "Трэба разабрацца" на тэлеканале АНТ, паведамляе БЕЛТА.
Сёння чарга на перасадку органаў у Беларусі адна з самых маленькіх у Еўропе. Ліст чакання на трансплантацыю печані для тых пацыентаў, якія маюць у ёй патрэбу, максімальна складае 5-6 месяцаў. Тэрмін чакання трансплантацыі ныркі - 1 год (і гэта адзін з самых нізкіх паказчыкаў не толькі ў Еўропе, але і свеце), сэрца - ад 6 да 9 месяцаў. Будаўніцтва новага цэнтра транспланталогіі дасць магчымасць яшчэ больш скараціць час чакання. Больш таго, новы корпус дасць магчымасць галіне больш эфектыўна развівацца ў бліжэйшыя 20-30 гадоў, а таксама дасць яшчэ адзін стымул да ўкаранення новых тэхналогій.
Раней Прэзідэнт Аляксандр Лукашэнка даручыў прапрацаваць пытанне аб мэтазгоднасці стварэння ў Беларусі асобнага новага цэнтра трансплантацыі органаў і тканак. Адпаведнае даручэнне кіраўнік дзяржавы даў, наведваючы РНПЦ, які функцыянуе на базе 9-й гарадской клінічнай бальніцы Мінска.
Паводле слоў Алега Румо, гэта рашэнне не было спантанным. Яно прынята на падставе дэталёвага аналізу таго, як развівалася беларуская транспланталогія апошнія некалькі гадоў. Беларускія медыкі навучыліся выконваць суперскладаныя дарагія высокарэнтабельныя тэхналогіі. І тая ўстанова, якая існуе на базе 9-й бальніцы, ужо не ўмяшчае ўсіх жадаючых пацыентаў і не дазваляе выконваць большую колькасць трансплантацый.
Гаварыць аб тым, дзе будзе размяшчацца новы цэнтр, пакуль рана. "Мы цяпер прапрацоўваем два варыянты. Побач з нашым корпусам трансплантацыі ёсць даволі шмат месца, якое можам выкарыстаць, каб пабудаваць сучасны вялікі хірургічны корпус прыкладна на 200 ложкаў. І гэты корпус, паводле нашых папярэдніх ацэнак, будзе каштаваць каля $50-55 млн", - сказаў кіраўнік РНПЦ. Ён адзначыў, што, хутчэй за ўсё, будаўніцтва будзе весціся за кошт бюджэтных сродкаў, але ўсе гэтыя грошы акупяцца ў сто разоў.-0-
