21 жніўня, Мінск /Кар. БЕЛТА/. Новы цэнтр транспланталогіі будзе створаны ў Беларусі, паведаміў карэспандэнту БЕЛТА кіраўнік Рэспубліканскага навукова-практычнага цэнтра трансплантацыі органаў і тканак Алег Румо.
"Кіраўніком дзяржавы прынята рашэнне, што будзе пабудаваны новы хірургічны корпус - цэнтр трансплантацыі органаў і тканак. Ён увойдзе ў склад аднаго вялікага цэнтра, які будзе называцца Мінскі цэнтр хірургіі, транспланталогіі і гематалогіі", - сказаў Алег Румо.
Паводле слоў кіраўніка РНПЦ, у суперсучасным корпусе размесцяцца аддзяленні для лячэння хірургічных пацыентаў, аперацыйныя і аддзяленне інтэнсіўнай тэрапіі і рэанімацыі.
Сродкі на будаўніцтва цэнтра ў роўных долях будуць выдзелены з гарадскога і рэспубліканскага бюджэтаў. Гаварыць аб тэрмінах уводу ў эксплуатацыю цэнтра і канчатковым кошце будаўніцтва пакуль дачасна, адзначыў Алег Румо.
Прапрацаваць пытанне аб мэтазгоднасці стварэння ў Беларусі асобнага новага цэнтра трансплантацыі органаў і тканак даручыў Прэзідэнт Аляксандр Лукашэнка ў час наведвання ў лютым бягучага года РНПЦ, які функцыянуе на базе 9-й гарадской клінічнай бальніцы Мінска.-0-
