30 жніўня, Мінск /Кар. БЕЛТА/. Новую рэдакцыю закона "Аб ахове здароўя" плануецца распрацаваць у 2019 годзе, паведаміла начальнік упраўлення кадравай палітыкі, устаноў адукацыі Міністэрства аховы здароўя Рэспублікі Беларусь Вольга Маршалка ў час круглага стала ў БЕЛТА.
"Ахова здароўя, медыцынскія тэхналогіі развіваюцца настолькі імкліва, што дзеючы закон, які абнаўляўся ўсяго чатыры гады таму, патрабуе ўжо карэкціроўкі. Неабходна ўнесці вялікую колькасць паняццяў, а многія давядзецца мяняць, - адзначыла яна. - У 2019 годзе плануецца распрацаваць новую рэдакцыю закона аб ахове здароўя".
Паводле яе слоў, пры распрацоўцы новага законапраекта будуць разглядацца ў тым ліку пытанні біяэтыкі, якія датычацца рэпрадуктыўных тэхналогій, транспланталогіі, кланіравання і інш.
Паводле інфармацыі Міністэрства аховы здароўя, змяненні і дапаўненні таксама закрануць электронную ахову здароўя, кантралюемае лячэнне, перадабортнае кансультаванне, ролю прафесійных медыцынскіх асацыяцый, абарону правоў медыцынскіх работнікаў і інш.-0-
