21 мая, Мінск /Кар. БЕЛТА/. Няўстойлівае надвор'е з дажджамі і навальніцамі чакаецца ў Беларусі на гэтым тыдні, паведамілі карэспандэнту БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
"У наступныя двое сутак умовы надвор'я Беларусі будуць вызначаць атмасферныя франты. Захаваецца няўстойлівае надвор'е з кароткачасовымі дажджамі. Але ў другой палавіне тыдня тэрыторыя краіны апынецца пад уплывам скандынаўскага антыцыклону, і дажджоў будзе няшмат", - сказалі ў Гідрамеце.
У аўторак, 22 мая, ноччу ў асобных раёнах чакаюцца невялікія дажджы. Удзень у многіх раёнах краіны пройдуць кароткачасовыя дажджы, месцамі прагрымяць навальніцы. Тэмпература паветра ўначы складзе 6-12 градусаў вышэй за нуль, у асобных раёнах панізіцца да плюс 3 - плюс 5. Удзень будзе ў асноўным 15-21 градус цяпла, толькі па поўдні краіны паветра прагрэецца да плюс 23.
У сераду, 23 мая, умовы надвор'я на тэрыторыі Беларусі будуць вызначаць франтальныя раздзелы і няўстойлівыя паветраныя масы, што будуць паступаць з паўднёвага захаду Еўропы. На большай частцы тэрыторыі краіны пройдуць кароткачасовыя дажджы, у асобных раёнах з навальніцамі. Уначы і раніцай месцамі чакаецца слабы туман. Тэмпература паветра ноччу складзе 7-13 градусаў вышэй за нуль. Удзень будзе ў асноўным 18-24 градусы цяпла, па паўднёвым усходзе паветра прагрэецца да плюс 25 - плюс 27.
У чацвер, 24 мая, франтальныя раздзелы пакінуць тэрыторыю Беларусі. Ноччу месцамі чакаюцца кароткачасовыя дажджы, а ўдзень будзе пераважна без ападкаў, толькі па ўсходзе краіны пройдуць кароткачасовыя дажджы, у асобных раёнах прагрымяць навальніцы. Тэмпература паветра ўначы складзе 8-14 градусаў вышэй за нуль, па паўднёвым усходзе краіны - плюс 15 - плюс 16. Днём будзе ад 18 на паўночным захадзе да 25 градусаў цяпла на паўднёвым усходзе краіны.
У пятніцу, 25 мая, у асобных раёнах, у асноўным па поўдні краіны, чакаюцца кароткачасовыя дажджы, магчымы навальніцы. Тэмпература паветра ўначы складзе 6-13 градусаў вышэй за нуль. Удзень будзе 16-21 градус цяпла, па паўднёвым захадзе краіны паветра прагрэецца да плюс 24.-0-
