27 мая, Мінск /Кар. БЕЛТА/. Некаторыя рыбныя прадпрыемствы Беларусі давялося закрыць з-за санкцый, якія ўвёў расійскі бок адносна краін, дзе Беларусь закупляе рыбу, паведаміў сёння міністр сельскай гаспадаркі і харчавання Беларусі Леанід Заяц на сумесным пасяджэнні абедзвюх палат беларускага парламента, перадае карэспандэнт БЕЛТА.
"У мінулым годзе былі праінспектаваны службамі Рассельгаснагляду ўсе прадпрыемствы рыбнай галіны. Было закрыта 10 прадпрыемстваў. З кастрычніка (2015 года. - Заўвага БЕЛТА) і па сённяшні дзень нам удалося адкрыць усяго толькі два прадпрыемствы. Асноўная прычына - не антысанітарны парадак, а тое, што мы сёння перапрацоўваем рыбу з санкцыйных для Расіі краін", - сказаў Леанід Заяц.
Ён адзначыў, што ў кастрычніку 2015 года расійскія і беларускія спецыялісты праінспектавалі прадпрыемствы Нарвегіі, якія гатовы пастаўляць рыбу ў Беларусь. "Гэтыя прадпрыемствы былі ўнесены ў рэестр. Мы мелі поўнае права там купляць, перапрацоўваць і з новым змененым кодам пастаўляць прадукцыю на расійскі спажывецкі рынак", - сказаў кіраўнік Мінсельгасхарча. Аднак расійскі бок настойвае на перапрацоўцы ў Беларусі расійскай рыбы.
"Цяпер мы вельмі сур'ёзна працуем з Рассельгаснаглядам не толькі па рыбных прадпрыемствах, але і па ўсіх астатніх. У нас і мясакамбінаты ў некаторай ступені закрыты. Мы склалі ўвесь пералік неабходных дакументаў пасля інспектавання спецыялістамі Рассельгаснагляду ў красавіку бягучага года, перадалі пакет дакументаў на разгляд, каб прадпрыемствы былі адкрыты, у прыватнасці "Сузор'е" ў Полацкім раёне", - сказаў міністр.-0-