6 снежня, Мінск /Кар. БЕЛТА/. МУС вынесла на грамадскае абмеркаванне пытанне абмежавання продажу алкагольных напіткаў, паведаміў журналістам у прэс-цэнтры БЕЛТА намеснік начальніка ўпраўлення прафілактыкі галоўнага ўпраўлення аховы правапарадку і прафілактыкі міліцыі грамадскай бяспекі МУС Сяргей Красуцкі.
На афіцыйным сайце МУС прапануецца абмеркаваць некалькі пытанняў, у тым ліку ці варта, на думку грамадзян, абмяжоўваць час рэалізацыі алкагольных, слабаалкагольных напіткаў і піва (за выключэннем кафэ, бараў, рэстаранаў і іншых аб'ектаў грамадскага харчавання). Праваахоўнікі таксама цікавяцца меркаваннем, ці трэба абмяжоўваць продаж такіх напіткаў на аўтазаправачных станцыях, ці трэба прадаваць алкаголь толькі ў адасобленых таварных аддзелах магазінаў.
Абмеркаванне будзе праходзіць на працягу снежня-студзеня. Паводле слоў Сяргея Красуцкага, яно дасць магчымасць прыйсці да адзінай думкі. Прычым чым больш грамадзян адкажуць на гэтыя пытанні, тым больш зразумелай і дакладнай складзецца карціна.
Што датычыцца ўказа, якім прадугледжваецца ўстанаўленне некаторых абмежаванняў на рознічны гандаль алкаголем, у ім закладзены адзіны час рэалізацыі алкагольнай прадукцыі - з 9.00 да 23.00. Гэта значыць выключаецца начны гандаль алкаголем. Для аб'ектаў, якія маюць гандлёвую залу ў памеры 1 тыс. і больш кв.м, абавязковай павінна быць наяўнасць асобнай пляцоўкі для рэалізацыі алкаголю. Уносілася прапанова, каб выключыць гандаль алкаголем на запраўках, аднак, паводле слоў Сяргея Красуцкага, большасць зацікаўленых у гэтым пытанні ініцыятыву не падтрымала.
Кожнае чацвёртае злачынства ў краіне ўчыняецца ў стане алкагольнага ап'янення. Доля забойстваў, наўмысных прычыненняў цяжкіх цялесных пашкоджанняў, грабяжоў, разбойных нападзенняў і хуліганстваў, учыненых у такім стане, дасягае 70-80 працэнтаў. Ужыванне спіртнога з'яўляецца першапрычынай абсалютнай большасці фактаў насілля ў сям'і.
Агульнадаступнасць алкагольных, слабаалкагольных напіткаў і піва, іх паўсюдная рэалізацыя побач з іншымі групамі тавараў сфарміравалі ў грамадстве лаяльнае да іх стаўленне, фактычна згладзіўшы адрозненні паміж спіртным і прадуктамі харчавання, упэўнены намеснік начальніка ўпраўлення. Такое становішча садзейнічае алкагалізацыі насельніцтва і, адпаведна, павелічэнню колькасці асоб, якія ўчыняюць правапарушэнні ў стане ап'янення. У Беларусі склалася сітуацыя, калі колькасць гандлёвых аб'ектаў, што рэалізуюць такія напіткі, у разы перасягае ўзровень развітых краін. У сярэднім па рэспубліцы на 10 тыс. насельніцтва (уключаючы дзяцей і састарэлых) прыпадае 17 аб'ектаў гандлю, якія рэалізуюць алкаголь, або 1 магазін на 600 чалавек. Пры гэтым у Швецыі і Нарвегіі 1 гандлёвая кропка, што прадае напіткі мацнейшыя за 4,75 працэнта, прыпадае на 4,5 тыс. чалавек, у Фінляндыі - на 6,3 тыс., у Ісландыі - 15,9 тыс.
Сітуацыя ўскладняецца тым, што даходы ад вытворчасці і продажу алкаголю ляжаць у асноўным у сферы інтарэсаў прадпрыемстваў прамысловасці і гандлю ў большасці недзяржаўнай формы ўласнасці. Яны маюць велізарныя маркетынгавыя бюджэты, якія даюць магчымасць актыўна лабіраваць пытанне аб начным гандлі менавіта алкагольнымі, слабаалкагольнымі напіткамі і півам, без рэалізацыі якіх начны рэжым работы для суб'ектаў гаспадарання становіцца нерэнтабельным. У той жа час кароткачасовая выгада ад рэалізацыі насельніцтву спіртнога значна меншая за эканамічныя страты краіны, звязаныя са многімі фактарамі. Сярод іх павышаная смяротнасць грамадзян, якія злоўжываюць спіртным, страта імі працаздольнасці, расходы на лячэнне выкліканых ужываннем алкаголю захворванняў, сацыяльныя выплаты дзяржавы інвалідам, урон ад пажараў, ДТЗ, расходы на ўтрыманне зняволеных, барацьбу са злачыннасцю і безнагляднасцю непаўналетніх.
Сусветны вопыт паказвае, што адным з дзейсных прававых механізмаў стрымлівання алкагалізацыі грамадства з'яўляецца абмежаванне даступнасці спіртнога. Нормы, што абмяжоўваюць час і месца рэалізацыі алкагольных напіткаў, змяшчаюцца ў заканадаўстве Расіі, Туркменістана, Казахстана, Таджыкістана, Азербайджана і Малдовы. "Рэзка змяніць адносіны грамадзян да алкаголю не атрымаецца, тым не менш пэўныя крокі трэба рабіць, каб павысіць культуру спажывання алкаголю", - адзначыў Сяргей Красуцкі.-0-
