31 жніўня, Мінск /Вера Сяргеева - БЕЛТА/. Трактары МТЗ узаралі на полі каля Нацыянальнага аэрапорта Мінск надпіс "Беларусь - краіна мары" і фрагмент беларускага арнаменту, які прысутнічае на нацыянальным сцягу. Аб гэтым карэспандэнту БЕЛТА паведамілі на Мінскім трактарным заводзе.
Агульная плошча малюнка - 410х460 м. Яго відаць з самалётаў, якія ўзлятаюць і якія ідуць на пасадку. Над высокадакладным праектам на працягу двух тыдняў працаваў самы магутны трактар BELARUS-4522 (460 к. с.), а таксама BELARUS-82 і BELARUS-320.
"Была праведзена вялікая работа. На ўзгорыстай мясцовасці дакладнасць узворвання кантралявалася пры дапамозе сістэмы GPS-навігацыі і здымкі квадракоптарам. Назва краіны абазначана лацінкай - BELARUS, як і мадэлі нашых трактароў. Гэты вялізны малюнак павінен стаць своеасаблівай візітнай карткай нашай краіны і прызначаны ў тым ліку для дэманстрацыі магчымасцей беларускіх трактароў рознай магутнасці. Наша тэхніка эфектыўна як пры рабоце на дробнаконтурных палях, так і на вялікай плошчы", - растлумачылі на прадпрыемстве.
Цяпер Мінскі трактарны завод вядзе актыўную дзейнасць на рынках больш як 60 дзяржаў. Завод распрацоўвае, вырабляе і экспартуе колавыя трактары і запчасткі да іх, арганізуе на ліцэнзійнай аснове іх вытворчасць за мяжой, аказвае паслугі па наладжванні і правядзенні сэрвісу пастаўленых машын, праводзіць навучанне па эксплуатацыі і тэхабслугоўванні выпускаемай тэхнікі. Заказчыкам прапануюцца звыш 100 мадэлей трактароў у больш як 200 зборачных варыянтах для любых кліматычных і эксплуатацыйных умоў. Кожны дзясяты трактар у свеце - з Беларусі, сцвярджаюць на МТЗ.
Завод актыўна развівае прамысловы турызм. У пачатку бягучага года яго наведалі амаль 2 тыс. турыстаў, большасць з якіх іншаземцы.-0-
