4 лістапада, Мінск /Кар. БЕЛТА/. Беларускі рэспубліканскі саюз моладзі і Міжнародны інстытут міру правядуць 5 лістапада ў Вене круглы стол па пытаннях развіцця двухбаковых адносін у кантэксце "Беларусь - Аўстрыя", паведаміў карэспандэнту БЕЛТА другі сакратар ЦК БРСМ Алег Дзікун.
"Дыскусійная пляцоўка аб'яднае маладых экспертаў з Беларусі і Аўстрыі. Мы плануем абмеркаваць шэраг пытанняў, якія датычацца двухбаковых адносін паміж нашымі краінамі, у тым ліку ў частцы эканамічнай бяспекі, маладзёжнай палітыкі. Разлічваем на дыялог у пытаннях развіцця далейшых прыярытэтных напрамкаў партнёрства моладзі Беларусі і Еўрапейскага саюза", - адзначыў Алег Дзікун.
Ён сказаў, што ў ліпені гэтага года БРСМ прымаў у сябе моладзь з Аўстрыі. Ужо тады абмяркоўваліся магчымасці ўзаемадзеяння і рэалізацыі сумесных праектаў. Круглы стол у Вене стане чарговым крокам на шляху да супрацоўніцтва паміж беларускай і аўстрыйскай моладдзю.
"Кругламу сталу будзе папярэднічаць адкрытая дыскусія з удзелам прадстаўнікоў экспертнай супольнасці Беларусі для аўстрыйскіх сродкаў масавай інфармацыі. Мэта гэтых двух мерапрыемстваў - пашырэнне станоўчага іміджу краіны за мяжой і ў цэлым, нацыянальных інтарэсаў, стварэнне спрыяльнага мікраклімату для развіцця двухбаковых адносін на канале міжнароднага маладзёжнага супрацоўніцтва. Гэта і многае іншае з'яўляецца асноватворнымі задачамі БРСМ пры рэалізацыі свайго міжнароднага парадку дня", - дадаў Алег Дзікун.-0-