30 чэрвеня, Мінск /Кар. БЕЛТА/. МНС зноў нагадвае насельніцтву, што ў гарачае надвор'е неабходна захоўваць пэўныя правілы бяспекі, паведамілі БЕЛТА ў выратавальным ведамстве.
"Пад асаблівую рызыку ў гарачае надвор'е падпадаюць дзеці і пажылыя людзі", - адзначылі ў міністэрстве. Таксама там парэкамендавалі не забываць, што ў спёку трэба як мага менш знаходзіцца пад прамымі сонечнымі промнямі. Калі ж гэта непазбежна, то лепш за ўсё апрануць галаўны ўбор або закрыцца парасонам, выкарыстоўваць сонцаахоўны крэм. Важна ўлічыць, што найбольшая актыўнасць сонца прыпадае на час з 12.00 да 16.00.
"Гарачае надвор'е небяспечна для чалавека цеплавым перагрэвам і можа прывесці да абязводжвання арганізма, развіцця сонечнага і цеплавога ўдару, абвастрэння сардэчна-сасудзістых захворванняў", - дадалі ў МНС. Таму трэба захоўваць эмацыянальны спакой, паколькі любое пераўзбуджэнне ўзмацняе рызыку цеплавога або сонечнага ўдару. Трэба абмежаваць працяглыя паездкі на аўтамабілі, а калі гэтага пазбегнуць нельга, то трэба быць максімальна ўважлівым. У час спёкі можа пагаршацца самаадчуванне, адбывацца рассейванне ўвагі і зніжэнне рэакцыі.
"Не ўжывайце алкаголь - у спёку яго дзеянне на арганізм мнагакратна ўзмацняецца, плюс арганізм становіцца больш адчувальным да высокай тэмпературы", - папярэдзілі ў МНС. У той жа час у такое надвор'е трэба піць больш вады. Што ж датычыцца прадуктаў харчавання, то не трэба купляць іх з рук. Пры высокай тэмпературы бактэрыі размнажаюцца вельмі хутка, што можа прывесці да цяжкіх атручэнняў пры няправільным захоўванні прадуктаў.-0-
