9 лютага, Мінск /Кар. БЕЛТА/. МНС поўнасцю спыняе праверкі малога і сярэдняга бізнесу, паведаміў журналістам міністр па надзвычайных сітуацыях Уладзімір Вашчанка, перадае карэспандэнт БЕЛТА.
"Мы ўжо забаранілі поўнасцю праверку аб'ектаў малога і сярэдняга бізнесу. Сёння пастаўлена задача аператыўна завяршыць праверкі аб'ектаў, якія ўключаны ў каардынацыйны план", - сказаў Уладзімір Вашчанка.
У полі зроку застануцца ўзрывапажаранебяспечныя аб'екты, месцы з масавым пражываннем людзей - бальніцы, інтэрнаты, школы, дзіцячыя сады. Уладзімір Вашчанка падкрэсліў, што МНС гатова аказваць дапамогу кіраўнікам аб'ектаў у навядзення парадку, кансультаваць, праводзіць навучанне, растлумачальную работу. Як і раней міністэрства будзе рэагаваць на звароты грамадзян.
Вядзецца работа па скарачэнні работнікаў нагляду. "Па заканчэнні мінулага года мы амаль трэць работнікаў скарацілі. Вызваленыя рэсурсы будзем накіроўваць на растлумачальную работу, правядзенне заняткаў, усемагчымых акцый, у першую чаргу накіраваных на фарміраванне бяспекі культуры жыццядзейнасці ў нашым грамадстве", - адзначыў міністр. Супрацоўнікі будуць наведваць сем'і з дзецьмі, састарэлымі грамадзянамі, каб аказаць ім дапамогу, праводзіць растлумачальную работу, а таксама даводзіць да школьнікаў, студэнтаў, рабочых інфармацыю аб тым, да чаго прыводзіць нядбаласць.
Міністэрства паслядоўна вядзе работу па аптымізацыі патрабаванняў нарматыўных дакументаў у галіне пажарнай і прамысловай бяспекі, іх удасканаленні, прывядзенні да рэальнага жыцця. "Мы ўжо скарацілі, аптымізавалі больш за палавіну дзеючых патрабаванняў тэхнічных нарматыўна-прававых актаў, сёння работа гэта працягваецца. У рабоце больш за 10 тэхнічных нарматыўна-прававых актаў, якія аптымізуюцца. Мы плануем звесці іх у адзіны дакумент, як гэта зрабілі ў 2014 годзе з правіламі пажарнай бяспекі, калі 34 дзеючыя правілы былі зведзены ў адзіны дакумент", - адзначыў міністр.
Кіраўнікам арганізацый, прадпрыемстваў рэкамендавана вывучыць патрабаванні і абавязкі, прапісаныя ў заканадаўстве, якое датычыцца забеспячэння пажарнай бяспекі, проціпажарнага рэжыму. Па просьбе кіраўнікоў прадпрыемстваў супрацоўнікі МНС гатовы прыйсці і аказаць дапамогу пры правядзенні заняткаў, растлумачэнняў патрабаванняў норм, а таксама аказваць іншую падтрымку. Прапановы па аптымізацыі норм і правіл прымаюцца на сайце МНС у раздзеле "Прапановы ў ТНПА", а ў выпадку любых сумненняў у правільнасці дзеянняў работнікаў МНС можна звярнуцца непасрэдна да кіраўніка ведамства праз рубрыку "Задаць пытанне міністру".-0-
