6 верасня, Мінск /Кар. БЕЛТА/. Старшыня Савета Рэспублікі Нацыянальнага сходу Беларусі Міхаіл Мясніковіч заклікаў моладзь быць актыўнай у вырашэнні важных для грамадства і краіны пытанняў, паведамілі БЕЛТА ў прэс-службе Савета Рэспублікі па выніках сустрэчы спікера з дэлегацыяй маладзёжнага парламента Чавускага раённага Савета дэпутатаў.
У сустрэчы таксама ўдзельнічаў старшыня Пастаяннай камісіі Савета Рэспублікі па эканоміцы, бюджэце і фінансах Уладзімір Панцюхоў.
У час сустрэчы з маладымі людзьмі Міхаіл Мясніковіч заклікаў іх быць актыўнымі ў вырашэнні важных для грамадства і краіны пытанняў, выказваць свае ідэі і прапановы. Удзел у маладзёжным парламенце - гэта магчымасць праявіць свае лідарскія якасці, навучыцца працаваць у камандзе, уменню вылучаць ідэі і адстойваць свой пункт гледжання, адзначыў ён.
Старшыня Савета Рэспублікі таксама расказаў аб ходзе падрыхтоўкі новай рэдакцыі Кодэкса аб адукацыі. Саветам Рэспублікі накіраваны ў Савет Міністраў прапановы па ўдасканаленні нарматыўных прадпісанняў кодэкса. Яны былі падтрыманы і ўлічаны. Гэтыя прапановы датычыліся забеспячэння ўзаемасувязі выхавання і навучання ў адукацыйным працэсе, развіцця сучаснага інфармацыйнага асяроддзя і сістэмы падтрымкі таленавітай моладзі, падрыхтоўкі кадраў для інавацыйных, экспартна арыентаваных прадпрыемстваў з улікам узмацнення практычнай накіраванасці навучання і інш.
Асаблівая ўвага ў час размовы з маладымі парламентарыямі была ўдзелена пытанням падрыхтоўкі V Форуму рэгіёнаў Беларусі і Расіі, які пройдзе ў Магілёве 10-12 кастрычніка. Прадугледжана мноства маладзёжных мерапрыемстваў. Гэта форум Беларусі і Расіі "Моладзь за Саюзную дзяржаву", злёт студэнцкіх атрадаў дзвюх краін, відэамост "Адкрыты дыялог", фінал конкурсу музычнага выканальніцкага мастацтва юных талентаў Магілёўскай і Бранскай абласцей, турнір па хакеі з шайбай спартакіяды Саюзнай дзяржавы для дзяцей і юнацтва і інш.-0-