24 ліпеня, Брэст /Кар. БЕЛТА/. Школьнікі з Мінска ўстанавілі тры нацыянальныя рэкорды па зборцы кубіка Рубіка, паведамляе карэспандэнт БЕЛТА.
Такі рэзультат падлеткі паказалі на пятым адкрытым міжнародным чэмпіянаце па скораснай зборцы кубіка Рубіка, які прайшоў у Брэсце 22-23 ліпеня. У спаборніцтвах па спідкубінгу ўдзельнічалі 42 аматары галаваломкі. У Брэсце сустрэліся аднадумцы з розных рэгіёнаў Беларусі, а таксама Кракава, Адэсы, Валгаграда, Масквы і Маскоўскай вобласці. Самаму старэйшаму ўдзельніку споўнілася 33 гады, самаму юнаму - 9 гадоў.
На чэмпіянаце акрамя зборкі традыцыйнага кубіка Рубіка (3x3x3) мацнейшага вызначалі яшчэ ў 17 дысцыплінах. У тым ліку галаваломку збіралі адной рукой, усляпую і нават нагой. На спаборніцтвах было пабіта тры рэкорды. "У дысцыпліне "кубік 2х2" нацыянальны рэкорд Беларусі з адзінкавай спробай (1,50 сек) устанавіў 11-класнік з Мінска Уладзіслаў Камінскі. Ён жа пабіў рэкорд краіны ў класічнай зборцы дзвюма рукамі па сярэднім часе з пяці спроб - 8,84 сек. Яшчэ адзін сталічны школьнік Андрэй Молчан устанавіў рэкорд у дысцыпліне "кубік 5х5" (1 мін 6,21 сек)", - расказалі арганізатары. Лепшыя рэзультаты спаборніцтва ў Брэсце зафіксаваны ў базе Сусветнай асацыяцыі кубіка WCA.
Таксама ў гэтыя дні для жадаючых былі арганізаваны спецыяльныя зоны навучання, дзе можна было спасцігнуць азы спідкубінга, праведзены майстар-класы па зборцы простых форм кубіка.-0-
