7 чэрвеня, Мінск /Кар. БЕЛТА/. У Беларусі на працягу апошніх 7 гадоў не было выяўлена фактаў карупцыі пры паступленні абітурыентаў. Аб гэтым паведаміў сёння намеснік прэм'ер-міністра, старшыня дзяржаўнай камісіі па кантролі за ходам правядзення ўступных іспытаў ва ўстановах вышэйшай і сярэдняй спецыяльнай адукацыі Васіль Жарко на пасяджэнні камісіі, якое адбылося сёння ў КДК, перадае карэспандэнт БЕЛТА.
"Несумненна, вынікі ўступнай кампаніі маюць важнае сацыяльнае значэнне, паколькі яны закранаюць інтарэсы многіх: абітурыентаў, сваякоў, выкладчыкаў, настаўнікаў, - сказаў Васіль Жарко. - Работа дзяржкамісіі ў цесным кантакце з КДК і Міністэрствам адукацыі садзейнічала стварэнню адкрытага, празрыстага і дэмакратычнага механізма фарміравання студэнцкай аўдыторыі краіны. На працягу апошніх 7 гадоў не было выяўлена фактаў карупцыі пры паступленні абітурыентаў ва ўстановы вышэйшай і сярэдняй спецыяльнай адукацыі".
Васіль Жарко звярнуўся да членаў дзяржаўнай камісіі з просьбай забяспечыць поўны і ўсебаковы кантроль на ўсіх этапах уступнай кампаніі. "На падрыхтоўчым этапе трэба праверыць гатоўнасць аўдыторый, наяўнасць медпунктаў, прааналізаваць склад камісій, практыку работы па прыёме дакументаў абітурыентаў. Асаблівую ўвагу ўдзяліць выбарачнай праверцы дакладнасці дакументаў аб адукацыі", - адзначыў Васіль Жарко.
У гэтым годзе ў тэставай форме будуць праводзіцца ўсе ўступныя іспыты па агульнаадукацыйных прадметах. Таму на кантролі за правядзеннем ЦТ сканцэнтравана асаблівая ўвага дзяржкамісіі.
На другім этапе яна будзе кантраляваць увесь працэс прыёму дакументаў, падрыхтоўкі, правядзення ўступных іспытаў (пры іх наяўнасці) і залічэння абітурыентаў. Іспыты ўнутры ВНУ будуць праводзіцца толькі па "творчасці" (малюнак, музыка, танец), фізічнай культуры і літаратуры. Такія іспыты, як правіла, складаюцца з некалькіх этапаў, з-за сваёй спецыфікі не пазбаўлены суб'ектывізму і па гэтай прычыне патрабуюць асаблівага кантролю.
"Сур'ёзная ўвага павінна быць удзелена кантролю ўмоў захоўвання, парадку доступу і выбару экзаменацыйных матэрыялаў, - дадаў старшыня дзяржкамісіі. - У дні іспытаў у карпусах, дзе яны праходзяць, не павінна быць пабочных асоб".
"Грамадзяне нашай рэспублікі павінны быць упэўнены, што галоўным прыярытэтам, што дае права на паступленне, з'яўляюцца выключна веды абітурыентаў", - сказаў на заканчэнне Васіль Жарко.-0-
