3 кастрычніка, Мінск /Вікторыя Апанасёнак - БЕЛТА/. Маладзёжны саюз Германіі праяўляе зацікаўленасць у рэалізацыі сумесных з Беларуссю праектаў у журналістыцы і ІТ-сферы. Аб гэтым паведаміў карэспандэнту БЕЛТА Юнес Уакас, кіраўнік дэлегацыі саюза, якая наведвае Мінск.
Паводле яго слоў, дэлегацыя прыбыла ў Мінск для азнаямлення з краінай, яе развіццём і патэнцыялам. "Мы прыехалі ў Беларусь не для таго, каб вучыць некага, а, наадварот, вучыцца самім. Вельмі шмат даведаліся пра краіну і атрымалі ўражанні, якія дапамогуць у нашай рабоце", - падкрэсліў Юнес Уакас. Пры гэтым ён удакладніў, што вялікі інтарэс у Маладзёжнага саюза Германіі выклікаюць праекты ў галіне мас-медыя і інфармацыйных тэхналогій, дзе двухбаковае супрацоўніцтва можа развівацца найбольш эфектыўна. "Гэта ўзаемадзеянне паміж нямецкімі і беларускімі журналістамі, інавацыі ў галіне інфармацыйных тэхналогій", - сказаў ён.
Юнес Уакас таксама дадаў, што дэлегацыя Маладзёжнага саюза Германіі плануе ў бліжэйшым будучым чарговы раз наведаць Беларусь. "Я ўпэўнены, што ў нас будзе паўторны візіт у Беларусь, і не выключаю, што гэта адбудзецца праз пару месяцаў", - рэзюмаваў ён.
Сёння дэлегацыя Маладзёжнага саюза Германіі наведала інфармацыйнае агенцтва БЕЛТА, азнаёмілася са структурай і спецыфікай яго работы, вывучыла асаблівасці падрыхтоўкі і выпуску выданняў "7 дней", "Беларуская думка", "Экономика Беларуси".
Маладзёжны саюз Германіі - сумесная маладзёжная арганізацыя палітычных партый Хрысціянска-дэмакратычны саюз і Хрысціянска-сацыяльны саюз (партыйны блок ХДС/ХСС). Яна налічвае каля 120 тыс. членаў ва ўзросце ад 14 да 35 гадоў. Дзейнасць саюза накіравана на папулярызацыю палітычных прыярытэтаў блока ХДС/ХСС у асяроддзі моладзі, а таксама забеспячэнне ўліку інтарэсаў маладога пакалення ў рабоце гэтых партый.-0-
Фота Аксаны Манчук
