26 верасня, Вена /Кар. БЕЛТА/. Магчымая карэкціроўка графіка будаўніцтва Беларускай АЭС яшчэ прапрацоўваецца, паведаміў сёння журналістам намеснік міністра энергетыкі Міхаіл Міхадзюк на палях 60-й сесіі Генеральнай канферэнцыі МАГАТЭ ў Вене, перадае карэспандэнт БЕЛТА.
"Нейкая карэкціроўка магчыма. Гэтыя пытанні цяпер з генпадрадчыкам прапрацоўваюцца", - сказаў Міхаіл Міхадзюк.
Няштатная сітуацыя на пляцоўцы БелАЭС адбылася 10 ліпеня 2016 года: корпус рэактара праслізнуў па стропах і павіс дыяганальна, дакрануўшыся да зямлі. Беларусь прыняла рашэнне замяніць корпус рэактара, у сваю чаргу "Расатам" заявіў, што гатовы замяніць яго.
Беларуская АЭС - праект па будаўніцтве атамнай электрастанцыі тыпу ВВЭР-1200, які рэалізуецца за 18 км ад Астраўца (Гродзенская вобласць). БелАЭС будзе складацца з двух энергаблокаў сумарнай магутнасцю да 2400 (2х1200) МВт.-0-