19 верасня, Мінск /Кар. БЕЛТА/. Кошт пуцёвак у беларускія здраўніцы на чацвёрты квартал бягучага года знізіўся ў свабоднай рэалізацыі практычна да ўзроўню другога квартала, паведаміў карэспандэнту БЕЛТА дырэктар Рэспубліканскага цэнтра па аздараўленні і санаторна-курортным лячэнні насельніцтва Генадзь Балбатоўскі.
"Сярэдні кошт 1 ложка-дня па пуцёўках, што самастойна рэалізуюцца здраўніцамі юрыдычным і фізічным асобам, з размяшчэннем у двухмесным аднапакаёвым нумары ў студзені-жніўні 2017 года склаў Br49,55 - гэта на 3,5 працэнта вышэй, чым у снежні 2016 года, - канстатаваў Генадзь Балбатоўскі. - Прагназуецца, што сярэдні кошт 1 ложка-дня па пуцёўках у свабоднай рэалізацыі ў чацвёртым квартале складзе каля Br50 - на 1 працэнт вышэй, чым у другім квартале, і на 5,6 працэнта ніжэй, чым у трэцім квартале бягучага года (як вядома, летам традыцыйна цэны на пуцёўкі вышэйшыя)".
Для забеспячэння найбольшай даступнасці санаторна-курортных і аздараўленчых паслуг, павышэння попыту на паслугі беларускія здраўніцы прымяняюць гібкую сістэму скідак у залежнасці ад камфортнасці нумароў, сезона, колькасці дзён знаходжання. У многіх санаторна-курортных арганізацыях для грамадзян Беларусі прадастаўляецца магчымасць растэрміноўкі плацяжу за пуцёўку. Праводзяцца акцыі "Гарачыя пуцёўкі", "Ранняе браніраванне", "Жаданы госць", "Залатая картка госця", "Сярэбраная картка госця" і інш.
Дарэчы, найбольшым попытам карыстаюцца пуцёўкі працягласцю 12-14 дзён.
Паводле слоў субяседніка, продаж пуцёвак у беларускія здраўніцы на чацвёрты квартал ідзе даволі актыўна. "Глыбіня продажаў павялічваецца ў параўнанні з мінулым годам", - сказаў дырэктар цэнтра. Напрыклад, у санаторна-курортных арганізацыях ААТ "Белаграздраўніца" на кастрычнік ужо выкуплена амаль 92 працэнты ад ложкавай магутнасці санаторыяў, на лістапад - каля 70 працэнтаў, адкрыта браніраванне на снежань, у тым ліку на навагоднія святы.
Трэба адзначыць, што сярэдні кошт аднаго ложка-дня па пуцёўках для дарослых, набытых Рэспубліканскім цэнтрам па аздараўленні і санаторна-курортным лячэнні насельніцтва за кошт бюджэтных сродкаў на 2017 год, у параўнанні з 2016 годам павялічыўся толькі на 2,6 працэнта і склаў Br32,92 (у 2016 годзе - Br32,10).-0-
