2 снежня, Мінск /Кар. БЕЛТА/. Рэжым па барацьбе з адмываннем грошай і фінансаваннем тэрарызму ў Беларусі адпавядае асноўным патрабаванням міжнародных стандартаў, за апошні час яго ўзровень значна палепшыўся. Аб гэтым заявіў журналістам дырэктар Дэпартамента фінансавага маніторынгу КДК Вячаслаў Рэут, перадае карэспандэнт БЕЛТА.
"У Ашхабадзе з 24 па 29 лістапада прайшло пасяджэнне Еўразійскай групы па процідзеянні легалізацыі злачынных даходаў і фінансавання тэрарыстычнай дзейнасці (ЕАГ). Для Беларусі гэта было асаблівае пасяджэнне, таму што на ім разглядалася пытанне аб ацэнцы дзеючай у краіне сістэмы па барацьбе з гэтымі злачынствамі. Па выніках пасяджэння прынята рашэнне, што дзеючы ў краіне рэжым па барацьбе з адмываннем грошай і фінансаваннем тэрарызму адпавядае асноўным патрабаванням міжнародных стандартаў. Беларусь атрымала высокія ацэнкі і рэйтынгі. Нам удалося значна палепшыць свае паказчыкі: на працягу 10 гадоў мы знаходзіліся ва ўзмоцненым маніторынгу ЕАГ, а цяпер будзем на стандартным", - сказаў Вячаслаў Рэут.
Ацэнка праходзіла па 40 крытэрыях адпаведнасці заканадаўства Беларусі рэкамендацыям ФАТФ і 11 крытэрыям эфектыўнасці самой сістэмы. На думку экспертаў, у Беларусі ёсць разуменне рызык і пагроз, выпрацаваны даволі эфектыўны механізм процідзеяння. На высокім узроўні знаходзіцца ўзаемадзеянне ўсіх элементаў структуры: праваахоўных органаў, Дэпартамента фінансавага маніторынгу, банкаў, міністэрстваў і іншых ведамстваў. Цеснае супрацоўніцтва названа "моцным бокам беларускай сістэмы". У якасці прыкладу была прыведзена арганізацыя кантролю над правядзеннем II Еўрапейскіх гульняў. У той жа час прадстаўнікі міжнароднай супольнасці вызначылі і існуючыя недахопы нацыянальнай сістэмы. Напрыклад, адзначаны недастатковы кантроль у сферы дзейнасці некамерцыйных арганізацый.
Вячаслаў Рэут падкрэсліў, што такая высокая ацэнка работы Беларусі ў гэтым напрамку дасць краіне магчымасць знізіць рызыкі ўзаемадзеяння з замежнымі банкамі. "У нас добрая справаздача. Краіны і кампаніі, якія супрацоўнічаюць з намі, убачаць, што ў краіне існуе рэжым, з дапамогай якога можна адсачыць законнасць правядзення фінансавых аперацый і забяспечыць выкананне ўсіх міжнародных патрабаванняў, і будуць да нас больш прыхільныя. Адпаведна, усе нашы крэдытныя рэйтынгі будуць павышаны, як вынік, зменшацца стаўкі па крэдытах", - сказаў ён на заканчэнне.-0-
