2 мая, Мінск /Кар. БЕЛТА/. Студатрадаўскі рух з'яўляецца магутнай сацыяльнай пляцоўкай, дзе моладзь адточвае навыкі і ўменні будучай прафесіі. Такое меркаванне сёння выказаў журналістам міністр адукацыі Беларусі Ігар Карпенка перад адкрыццём трэцяга працоўнага семестра, перадае карэспандэнт БЕЛТА.
"Студатрадаўскі рух - не проста нейкая забава, дзе маладыя людзі, як прынята цяпер казаць, могуць патусавацца. Гэта магутная сацыяльная пляцоўка, дзе моладзь адточвае свае прафесійныя ўменні і навыкі будучай прафесіі, а таксама грамадскія і сацыяльныя ролі, якія выконвае малады спецыяліст, які прыйшоў на вытворчасць, у сферу паслуг, адукацыю, медыцыну і г.д.", - сказаў Ігар Карпенка.
Паводле яго слоў, маладзёжны рух, які ў бягучым годзе адзначае 55 гадоў, набірае сілу і набывае новыя сучасныя рысы. "Гэтаму садзейнічае дзейнасць Беларускага рэспубліканскага саюза моладзі і тых міністэрстваў і ведамстваў, якія з'яўляюцца актыўнымі партнёрамі руху. Акрамя таго, вялікі ўклад уносіць беларуская дзяржава, яна стварае ўмовы для дзейнасці студэнцкіх атрадаў, пачынаючы ад заканадаўча-нарматыўна-прававой базы і заканчваючы ўсямернай падтрымкай канкрэтных кіраўнікоў, якія прымаюць студэнцкія атрады ў сябе на вытворчасці", - адзначыў міністр.
"Тая праца маладых людзей карысна не толькі ў эканамічным плане, але і ў выхаваўчым, таму што гэта будучыя спецыялісты, кіраўнікі, людзі, якія павінны адчуць, што такая вытворчасць, рэальны сектар эканомікі і ўбачыць сябе ў прафесіі", - дадаў Ігар Карпенка.
Трэці працоўны семестр стартаваў сёння на плошчы Дзяржаўнага сцяга ў Мінску. У бягучым годзе ён пройдзе пад эгідай 55-годдзя руху беларускіх студатрадаў. Ва ўрачыстай цырымоніі прынялі ўдзел больш як тысяча байцоў студэнцкіх атрадаў з усіх рэгіёнаў Беларусі.
Важная частка свята - рэспубліканская маладзёжная працоўная акцыя "Маладосць. Традыцыі. Будучыня", удзел у якой прымаюць больш за трыста байцоў СА. Стартуе акцыя на тэрыторыі гісторыка-культурнага комплексу "Лінія Сталіна". Тут моладзь закладзе сад "Кветкі Вялікай Перамогі" з 55 саджанцаў яблынь сорту "Слава пераможцу!". Акрамя таго, плануецца добраўпарадкаваць пешаходныя дарожкі па перыметры комплексу, ачысціць зялёныя зоны ад мінулагодняга лісця, пабяліць надаўбні - процітанкавыя загароды, правесці іншыя работы. Каля помніка маршалу СССР Георгію Жукаву юнакі і дзяўчаты разам з ветэранамі студатрадаўскага руху высадзяць конусападобныя туі.
Студатрадаўскі рух, накіраваны на працаўладкаванне студэнтаў і навучэнцаў у складзе студэнцкіх атрадаў і індывідуальна ў свабодны ад вучобы час, з'яўляецца вядучым напрамкам дзейнасці Беларускага рэспубліканскага саюза моладзі. Першыя атрады накіруюцца на месцы дыслакацыі ў канцы мая. Беларускія студэнты будуць працаваць як у Беларусі, так і за яе межамі - у Расіі, Польшчы. Рэспубліканскі штаб студэнцкіх атрадаў прапрацоўвае пытанне аб магчымай рабоце ў Казахстане і Малдове. Масава студэнты і навучэнцы пачнуць работу ў складзе студэнцкіх атрадаў пасля заканчэння летняй сесіі.
З 2003 года адроджаны БРСМ студатрадаўскі рух аб'яднаў больш за 960 тыс. маладых людзей.-0-
