17 ліпеня, Мінск /Надзея Мацвеева - БЕЛТА/. Інтэрактыўная карта кампенсацыйных пасадак зялёных насаджэнняў з'явіцца ў Мінску, паведаміў старшыня Мінскага гарадскога камітэта прыродных рэсурсаў і аховы навакольнага асяроддзя Сяргей Масляк на аператыўнай нарадзе ў Мінгарвыканкаме, перадае карэспандэнт БЕЛТА.
Сумесна з грамадскімі арганізацыямі разглядаецца пытанне аб распрацоўцы электроннай базы з унясеннем даных аб высаджваемых дрэвах і кустах, якія будуць уключаць відавы склад, узрост насаджэнняў, месца і дату пасадак. Інфармацыя будзе размяшчацца на інтэрактыўнай карце.
Акрамя таго, камітэт рэкамендуе адміністрацыям раёнаў горада разам з планамі па ліквідацыі аб'ектаў расліннага свету на сайтах інфармаваць і аб мерапрыемствах па азеляненні. Створана гарадская камісія па пытаннях кампенсацыйных пасадак, прымаюцца меры па ўдасканаленні сістэмы ўліку зялёных насаджэнняў.
Разам з тым у сталіцы застаецца запазычанасць па кампенсацыйных пасадках за мінулыя гады. Для яе ўстаранення ў 2016 годзе высаджана звыш 5,6 тыс. дрэў і каля 2,6 тыс. кустоў. "Раённым адміністрацыям неабходна прапрацаваць пытанні індывідуальна па кожным аб'екце і прыняць канкрэтныя рашэнні", - адзначыў Сяргей Масляк.
Усяго ў сталіцы, паводле статыстычных даных, з 1994 года высаджана звыш 1 млн дрэў. У красавіку з удзелам кіраўніцтва горада, прадстаўнікоў грамадскіх арганізацый, моладзі, ветэранаў у парку імя Паўлава адбылася акцыя па сімвалічнай пасадцы мільённага дрэва.-0-
