24 ліпеня, Мінск /Кар. БЕЛТА/. Гаспадаркі Беларусі ўбралі амаль палавіну траў другім укосам, паведаміў карэспандэнту БЕЛТА начальнік галоўнага ўпраўлення раслінаводства Міністэрства сельскай гаспадаркі і харчавання Беларусі Андрэй Занеўскі.
Па стане на 24 ліпеня травы скошаны на 403,8 тыс. га, што складае 49,8 працэнта да плана. Пры гэтым каля 85-90 працэнтаў скошаных траў убрана. Тэмпы работ па сенакашэнні прыкладна такія ж, як у мінулым годзе. Разам з тым гаспадаркі адстаюць ад мінулагодняга ўзроўню нарыхтоўкі травяных кармоў на ўмоўную галаву: 9,82 ц кармавых адзінак на сённяшні дзень супраць 11,13 ц кармавых адзінак на гэту дату ў мінулым годзе. Паводле апошніх даных, сельгасарганізацыі Беларусі нарыхтавалі 553,4 тыс. т сена (51,4 працэнта да плана) і больш за 9,7 млн т сенажу (77,7 працэнта).
"Дажджлівае надвор'е аказала ўплыў на працягласць укосаў. Павялічылася працягласць правяльвання і ўборкі траў. Вільгаці дастаткова, але нізкія тэмпературы ў начны час адмоўна паўплывалі на тэмп іх росту", - адзначыў Андрэй Занеўскі.
Паводле прагнозаў, другі ўкос траў аграрыі завершаць у сярэдзіне жніўня. "Пасля ўкосу на некаторых участках гаспадаркі прымаюць рашэнне запахать траву ў глебу і пасеяць збожжавыя культуры. На іншых участках пры правільнай падкормцы можа быць больш укосаў - тры і нават чатыры", - растлумачыў субяседнік.
Андрэй Занеўскі нагадаў, што першы ўкос траў у сельгасарганізацыях Беларусі завяршыўся 25 чэрвеня.-0-
