28 верасня, Мінск /Кар. БЕЛТА/. Два маштабныя агульнагарадскія сельскагаспадарчыя кірмашы пройдуць 1-2 кастрычніка ў Мінску, паведамілі БЕЛТА ў галоўным упраўленні спажывецкага рынку Мінгарвыканкама.
Так, 1 і 2 кастрычніка з 9.00 да 16.00 адбудзецца кірмаш выхаднога дня на пляцоўцы, якая прылягае да "Чыжоўка-Арэны". Сваю прадукцыю прадставяць прадпрыемствы Гомельскай вобласці (ААТ "Рагачоўскі МКК", ААТ "Мілкавіта", ААТ ПТФ "Рассвет", ДП "СК "Зара", ААТ" Калінкавічыхлебапрадукт", ААТ "Гомельская ПФ" і інш.).
У гэты ж час адбудзецца агульнагарадскі сельгаскірмаш выхаднога дня на пляцоўцы каля Палаца спорту з удзелам прадпрыемстваў Мінска, Мінскай вобласці, Белкаапсаюза і інш.
На кірмашах у шырокім асартыменце будзе прадстаўлена прадукцыя новага ўраджаю - бульба, капуста, буракі, морква, цыбуля, яблыкі, гарбузы, журавіны, а таксама мёд, мяса і паўфабрыкаты, каўбасныя вырабы, вэнджаніна, жывая рыба, саджанцы пладова-ягадных дрэў і кустоў.
Забяспечваецца бясплатная дастаўка сельгаспрадукцыі ветэранам Вялікай Айчыннай вайны і людзям з абмежаванымі магчымасцямі.
Кірмашы пройдуць на выхадных ва ўсіх адміністрацыйных раёнах сталіцы.-0-
