24 ліпеня, Мінск /Кар. БЕЛТА/. Цёплае і дажджлівае надвор'е чакаецца ў Беларусі на гэтым тыдні, паведаміла БЕЛТА намеснік начальніка службы метэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Святлана Рыбакова.
"Апошні працоўны тыдзень ліпеня абяцае быць цёплым, з характэрным для гэтых ліпеньскіх дзён тэмпературным фонам. Але атмасферныя франты, якія перамяшчаюцца з паўднёвага-захаду Еўропы, прынясуць не толькі цёплае паветра, але і абумовяць дажджы, якія часта будуць суправаджацца навальніцамі і парывістым ветрам", - адзначыла Святлана Рыбакова.
У аўторак, 25 ліпеня, уначы ў асобных раёнах, удзень на большай частцы тэрыторыі рэспублікі пройдуць кароткачасовыя дажджы. Удзень па паўднёвай палавіне рэспублікі чакаюцца навальніцы, у асобных раёнах моцныя ліўні, навальніцы месцамі будуць суправаджацца моцным парывістым ветрам, магчымы град. Уначы і раніцай месцамі туман. Тэмпература паветра ўначы складзе 12-18 градусаў цяпла, удзень - 22-28, па паўднёвым усходзе краіны паветра прагрэецца да 30 градусаў.
У сераду, 26 ліпеня, захаваецца няўстойлівае надвор'е, на большай частцы тэрыторыі рэспублікі пройдуць кароткачасовыя дажджы. У асобных раёнах чакаюцца навальніцы, моцныя дажджы, удзень магчымы град. Уначы будзе ад 15 да 20 градусаў цяпла, удзень - ад 21 па захадзе да 31 градуса па ўсходзе краіны.
У чацвер, 27 ліпеня, з ростам атмасфернага ціску надвор'е ненадоўга палепшыцца, але ў асобных раёнах рэспублікі не абыдзецца без кароткачасовых навальнічных дажджоў. Тэмпература паветра ўначы складзе 12-19 градусаў, удзень 22-28, па паўднёвым усходзе Гомельскай вобласці - да 30 градусаў са знакам плюс.
У пятніцу, 28 ліпеня, чарговая сістэма франтальных раздзелаў абумовіць уначы пераважна па паўднёвай палавіне, удзень на большай частцы тэрыторыі рэспублікі кароткачасовыя дажджы. Удзень у асобных раёнах чакаюцца навальніцы, моцныя дажджы, магчымы град. Уначы будзе 13-20 градусаў вышэй за нуль, удзень - 20-27, па ўсходзе ў асобных раёнах - да плюс 30 градусаў.-0-