27 ліпеня, Мінск /Кар. БЕЛТА/. ДАІ чарговы раз акцэнтуе ўвагу дарослых на неабходнасці кантролю і навучання дзяцей правілам бяспечных паводзін на дарозе, а таксама заклікае вадзіцеляў быць вельмі ўважлівымі пры праездзе нерэгулюемых пешаходных пераходаў і ў дварах. Аб гэтым БЕЛТА паведаміла старшы інспектар па асаблівых даручэннях УДАІ МУС Ганна Банадык.
"Летнія канікулы ў самым разгары, а значыць у дзяцей па-ранейшаму шмат вольнага часу, які яны праводзяць на вуліцы. ДАІ чарговы раз акцэнтуе ўвагу бацькоў, бабуль і дзядуляў на неабходнасці кантролю і навучання дзяцей правілам бяспечных паводзін на дарозе. Заклікае вадзіцеляў быць максімальна ўважлівымі пры праездзе нерэгулюемых пешаходных пераходаў і ў дварах", - сказала Ганна Банадык.
Яна адзначыла, што толькі за мінулыя суткі, 26 ліпеня, чацвёра дзяцей пацярпелі ў ДТЗ. Так, два пяцігадовыя дзіцяці трапілі пад колы машын у двары дома, 15-гадовы веласіпедыст трапіў пад аўтамабіль пры выездзе на дарогу, а 14-гадовы пасажыр матацыкла ўпаў з транспартнага сродку.
"Каб пазбегнуць трагічных падзей і зрабіць максімальна бяспечным адпачынак вашых дзяцей, пастаянна кантралюйце іх месцазнаходжанне і цікаўцеся, чым яны займаюцца на вуліцы. Малалетнія дзеці павінны пастаянна знаходзіцца пад наглядам дарослых. Тлумачце юным удзельнікам руху, што нельга рэзка выходзіць або выбягаць на дарогу з-за прыпаркаваных аўтамабіляў, нават калі гэта дарога знаходзіцца на прылеглай да жылой забудовы тэрыторыі, - звярнула ўвагу старшы інспектар. - Перш чым дзіця ступіць на пешаходны пераход, яно павінна спыніцца (зняць навушнікі, адключыць тэлефон) і агледзецца, пераканацца, што вадзіцелі паспелі яго заўважыць і спыніцца. У час перасячэння праезнай часткі глядзець па баках, а не размаўляць па тэлефоне або разглядаць малюнкі на экране планшэта".-0-
