25 ліпеня, Мінск /Кар. БЕЛТА/. Беларускі рэспубліканскі саюз моладзі 1 жніўня дасць старт традыцыйнай агульнарэспубліканскай акцыі "У школу з добрым сэрцам", паведаміла карэспандэнту БЕЛТА каардынатар валанцёрскага руху "Добрае сэрца" ЦК ГА "БРСМ" Аляксандра Ганчарова.
Акцыя прадоўжыцца па 15 верасня. Галоўная яе задача ў аказанні адраснай сацыяльнай падтрымкі шматдзетным, няпоўным, трапіўшым у складаную жыццёвую сітуацыю сем'ям, у якіх існуюць цяжкасці пры падрыхтоўцы дзяцей да навучальнага года, а таксама дзiцячым iнтэрнатным установам. Для гэтага валанцёры руху "Добрае сэрца" арганізуюць у вялікіх гандлёвых цэнтрах краіны пункты збору канцылярскіх прылад і спартыўных рэчаў, тавараў для дзіцячай творчасці, развіваючых настольных гульняў, навучальных дапаможнікаў, школьнага адзення, абутку.
Акрамя таго, у час акцыі запланаваны іншыя мерапрыемствы. Напрыклад, добраахвотнікі БРСМ правядуць працоўныя дэсанты з далейшай перадачай заробленых грошай на куплю школьных тавараў, канцэрты ў дзіцячых інтэрнатных установах, наведаюць дома дзяцей з абмежаванымі магчымасцямі і ўручаць ім падарункі.
"Удзел у акцыі могуць прыняць усе жадаючыя. У кожнага ёсць рэальная магчымасць набыць школьныя прылады для тых, хто ў іх сапраўды мае патрэбу. Падарункі для першаклашак можна перадаць праз валанцёраў БРСМ", - адзначыла Аляксандра Ганчарова.
Валанцёрскі рух "Добрае сэрца" - адзін з вядучых напрамкаў дзейнасці БРСМ, аб'ядноўвае больш за 35 тыс. юнакоў і дзяўчат па ўсёй краіне. Валанцёры на пастаяннай аснове аказваюць адрасную дапамогу і сацыяльную падтрымку ветэранам вайны і працы, адзінокім пажылым людзям, дзецям-інвалідам і дзецям-сіротам, дзецям з нядобранадзейных і апякунскіх сем'яў, дапамагаюць аднаўляць і добраўпарадкоўваць культавыя і гістарычныя аб'екты.-0-
