3 лістапада, Мінск /Кар. БЕЛТА/. Авіякампанія "Белавія" ўвяла дадатковы платны сэрвіс па пераафармленні памылкова запоўненых білетаў. Аб гэтым карэспандэнту БЕЛТА паведаміла начальнік аддзела рэкламы і камунікацый авіякампаніі Вольга Герасенка.
"Калі пасажыр убачыў памылку ў прозвішчы або імені і хоча пазбегнуць праблем у час рэгістрацыі на рэйс, ён можа па сваім жаданні перааформіць білет на платнай аснове", - адзначыла начальнік аддзела. Кошт такой паслугі складае 30 еўра і спаганяецца за кожнае пераафармленне авіябілета.
Вольга Герасенка расказала, што часам пасажыры афармляюць авіябілеты лацінскімі літарамі, перакладаючы прозвішча з рускай мовы. У той жа час пры рэгістрацыі на рэйс прад'яўляецца пашпарт, у якім прозвішча напісана ў беларускім варыянце. "Напрыклад, прадстаўніку нашай авіякампаніі будзе зразумела, што гэта адзін і той жа пасажыр, але пры вылеце з-за мяжы на рэгістрацыі могуць узнікнуць праблемы. Як бы там ні было, канчаткова рашэнне аб неабходнасці пераафармлення білета прымае сам пасажыр. Чалавек можа пакінуць білет з памылкамі, але ён павінен быць гатовы да таго, што рэгістрацыя на рэйс можа заняць больш часу", - растлумачыла яна.
Паслуга "Добраахвотнае пераафармленне авіябілета ў сувязі са змяненнем поля імя пасажыра ў авіябілеце" прадугледжвае пераафармленне авіябілета з мэтай карэкцыі поля імя пасажыра ў авіябілеце, каб даныя ў авіябілеце і пашпарце адпавядалі адно аднаму. Пры гэтым пераафармленне авіябілета на іншага пасажыра забаронена.
На сайце авіякампаніі адзначана, што пераафармленне авіябілета ў сувязі са змяненнем поля імя пасажыра на названых вышэй умовах магчыма ў выпадку, калі ў авіябілеце змешчаны толькі палётныя сегменты, аформленыя на ўласныя рэйсы "Белавія". Калі ў авіябілеце змешчаны палётныя сегменты іншых авіякампаній, пасажырам трэба звярнуцца ў службу падтрымкі кліентаў кампаніі, якая аформіла авіябілет, для ўдакладнення ўмоў пераафармлення.
Збор у памеры 30 еўра не спаганяецца з удзельнікаў праграмы "Белавія Лідар" (залатога і сярэбранага ўзроўняў), з пасажыраў, якім менш за 2 гады, за пераафармленне авіябілетаў, дзе змешчаны толькі палётныя сегменты бізнес-класа (пры камбінацыі ў білеце тарыфаў эканамічнага і бізнес-класа збор спаганяецца).
Разам з тым, беларускі авіяперавозчык паведамляе, што пераафармленне білета ў сувязі са змяненнем прозвішча або імя выконваецца бясплатна на падставе дакумента, які пацвярджае гэта змяненне. Такім дакументам можа быць пасведчанне аб шлюбе, разводзе, змяненні імя. "Пашпарт не з'яўляецца дакументам, які пацвярджае змяненне прозвішча або імя", - звярнулі ўвагу ў авіякампаніі.
"Белавія" - буйны авіяперавозчык Беларусі, вядучы грузавы. У канцы студзеня 2014 года пачала работу ў юрыдычным статусе адкрытага акцыянернага таварыства. Авіякампанія, у флоце якой 27 самалётаў, выконвае ўласныя рэгулярныя рэйсы ў 46 аэрапортаў 28 краін Еўропы, СНД і Азіі. З 1997 года "Белавія" - правадзейны член Міжнароднай асацыяцыі паветранага транспарту (IATA), з 2010-га - член Асацыяцыі еўрапейскіх рэгіянальных авіякампаній (ERAA). Прырост пасажырскіх перавозак авіякампаніі па выніках васьмі месяцаў бягучага года склаў 5 працэнтаў у параўнанні з аналагічным перыядам мінулага года.-0-
