17 кастрычніка, Мінск /Кар. БЕЛТА/. Беларускія дэпутаты на асенняй сесіі разгледзяць змяненні і дапаўненні ў закон аб пенсійным забеспячэнні, паведаміла карэспандэнту БЕЛТА член Пастаяннай камісіі Палаты прадстаўнікоў па працы і сацыяльных пытаннях Юлія Мурына.
Паводле слоў Юліі Мурынай, у час работы ў акрузе, ад якой яна выбіралася ў парламент, да яе неаднаразова паступалі звароты аб неабходнасці карэкціроўкі парадку выплаты дапамогі па доглядзе інваліда І групы або асобы, якая дасягнула 80-гадовага ўзросту, асобным катэгорыям грамадзян. Увогуле з аналагічнай прапановай на прыём да дэпутата прыйшлі амаль 50 чалавек. "Быў накіраваны запыт у Міністэрства працы і сацыяльнай абароны з просьбай перагледзець палажэнне аб парадку назначэння і выплаты дапамогі па доглядзе інваліда І групы або асобы, якая дасягнула 80-гадовага ўзросту. Размова ідзе аб выплаце дапамогі людзям, якія дасягнулі агульнаўстаноўленага пенсійнага ўзросту, але не маюць права на працоўную пенсію па ўзросце з-за адсутнасці страхавога стажу".
Юлія Мурына звярнула ўвагу, што ў Беларусі ёсць катэгорыя грамадзян, якія працяглы час ажыццяўлялі сацыяльна значныя віды дзейнасці і па гэтай прычыне проста не мелі магчымасці сфарміраваць стаж работы з абавязковай выплатай страхавых узносаў у бюджэт дзяржаўнага пазабюджэтнага фонду, патрэбны для назначэння працоўнай пенсіі па ўзросце (страхавы стаж). Гэтыя людзі трапілі ў "пенсійную пастку", заўважыла парламентарый. "Так, у 2017 годзе патрэбны страхавы стаж складае 16 гадоў і паступова павышаецца (штогод на шэсць месяцаў) да дасягнення 20 гадоў да 2025 года", - расказала субяседніца.
Папраўкі ў дзеючае заканадаўства прадугледжваюць змяншэнне працягласці стажу работы з выплатай страхавых узносаў для грамадзян, якія ажыццяўлялі догляд інваліда І групы або дзіцяці-інваліда ва ўзросце да 18 гадоў, а таксама асоб, якія дасягнулі 80-гадовага ўзросту. Такія грамадзяне будуць мець права на працоўную пенсію па ўзросце пры наяўнасці не менш як 10 гадоў страхавога стажу і агульнага стажу работы не менш як 40 гадоў у мужчын і 35 гадоў у жанчын.
Працягласць стажу работы з выплатай абавязковых страхавых узносаў таксама змяншаецца для грамадзян, якія працяглы час (не менш за 10 гадоў) праходзілі ваенную службу (службу ў ваенізаваных арганізацыях), але не маюць права на пенсію па заканадаўстве аб пенсійным забеспячэнні ваеннаслужачых. Права на працоўную пенсію па ўзросце прадугледжана прадаставіць гэтай катэгорыі грамадзян пры наяўнасці не менш як 10 гадоў страхавога стажу і агульнага стажу работы не менш як 25 гадоў у мужчын і 20 гадоў у жанчын.
Змяненні і дапаўненні ў закон "Аб пенсійным забеспячэнні", якія рыхтуюцца да разгляду ў Авальнай зале, прыводзяць заканадаўства ў адпаведнасць з указам Прэзідэнта нумар 233 "Аб пенсійным забеспячэнні асобных катэгорый грамадзян" (падпісаны 29 чэрвеня 2017 года).-0-
