3 кастрычніка, Мінск /Кар. БЕЛТА/. Функцыянал беларускіх педыятраў пашырыцца, паведаміў журналістам міністр аховы здароўя Валерый Малашка, перадае карэспандэнт БЕЛТА.
"Мы гатовы да пэўнай трансфармацыі і развіцця службы. У бліжэйшыя гады павінны звярнуць увагу на амбулаторна-паліклінічную дапамогу дзецям. Цяпер даволі актыўна развіваем пярвічнае звяно медыцынскай дапамогі даросламу насельніцтву, фарміруем інстытут урача агульнай практыкі. У многім гэты шлях павінны прайсці і ў педыятрыі, дадаўшы пэўныя кампетэнцыі ўрачу-педыятру", - сказаў Валерый Малашка.
Як растлумачыла начальнік аддзела медыцынскай дапамогі маці і дзецям галоўнага ўпраўлення арганізацыі медыцынскай дапамогі і экспертызы Міністэрства аховы здароўя Людміла Лёгкая, паступова ўчастковых педыятраў будуць рыхтаваць да таго, каб яны маглі ацаніць стан лор-органаў, вачэй, каб у іх былі навыкі агляду неўралагічнага статусу дзіцяці, а ў выпадку неабходнасці накіроўвалі пацыента да вузкага спецыяліста. Гэта датычыцца работы педыятраў у паліклініках гарадоў. У сельскай мясцовасці абслугоўванне дзяцей у асноўным вядзецца ўрачамі агульнай практыкі.
Змяненні прывядуць да вырашэння арганізацыйных пытанняў, у тым ліку будзе пераглядацца працягласць часу прыёму. Змяненні не будуць імгненнымі, патрабуецца час на падрыхтоўку спецыялістаў.
Валерый Малашка адзначыў, што шматпрофільныя цэнтры для аказання меддапамогі дзецям ёсць у кожнай вобласці. Высокія тэхналогіі даступны ва ўсіх рэгіёнах. У сувязі з гэтым яшчэ актуальней стаіць пытанне рэфармавання амбулаторна-паліклінічнага звяна. Разам з гэтым важна захаваць яго прафілактычную накіраванасць.
У Беларусі выпрацавана аптымальная мадэль аказання дапамогі маці і дзецям, яна даказала сваю эфектыўнасць. Сусветнай арганізацыяй аховы здароўя беларуская мадэль рэкамендавана для прымянення ў краінах постсавецкай прасторы.
У Мінску 3-4 кастрычніка праходзіць дзясяты З'езд педыятраў. Спецыялісты з усёй Беларусі і запрошаныя госці з іншых краін абмяркоўваюць навуковыя і практычныя аспекты развіцця педыятрыі, праблемы правядзення аўдыту якасці аказання меддапамогі дзецям, сучасныя тэхналогіі медыцынскай генетыкі і прэнатальнай дыягностыкі, харчаванне здаровага і хворага дзіцяці, вакцынапрафілактыку, перынатальную медыцыну і неадкладныя станы. Таксама плануецца ўдзяліць увагу праблеме дзіцячай інваліднасці і яе прафілактыцы. З дакладамі выступяць спецыялісты з Беларусі, Германіі, Чэхіі, Расіі, Арменіі і інш.
Арганізатары мерапрыемства - Міністэрства аховы здароўя Беларусі і РНПЦ "Маці і дзіця".-0-
