12 сакавіка, Мінск /Кар. БЕЛТА/. ААТ "Беларуськалій" акажа дапамогу сем'ям загінулых шахцёраў, паведаміў 11 сакавіка журналістам генеральны дырэктар ААТ "Беларуськалій" Іван Галаваты, перадае карэспандэнт БЕЛТА.
"Работнікі знаходзіліся пад выкінутай рудой, побач з абсталяваннем. Як ні сумна, смерць настала імгненна, у долю секунды, калі адбылося абрушэнне даху. Усяго на рудніку працавала каля 150 чалавек, а ў напрамку, дзе адбылася аварыя, - 14 чалавек. Гэта горны ўчастак, які складаецца з некалькіх праходчых комплексаў", - адзначыў Іван Галаваты.
Гарнякоў шукалі больш за 30 гадзін, завалы разбіралі ўручную. З роднымі загінулых працуюць псіхолагі. У шахцёраў засталіся жонкі, у Максіма Іванова - дзве дачкі, у Дзмітрыя Валькова - сын.
"Прадпрыемства цалкам акажа садзейнічанне ў рамках пахавальных працэдур. Таксама будзе, вядома, аказана матэрыяльная дапамога і падтрымка ў наступныя гады. Прадпрыемства не забывае работнікаў, якія трагічна пайшлі з жыцця, і іх сем'і, аказвае дапамогу і пры вучобе дзяцей, і пры далейшым працаўладкаванні", - сказаў Іван Галаваты.
Здарэнне, як мяркуецца, звязана з асаблівымі геалагічнымі структурамі - мульдамі, у ядрах якіх пад вялікім ціскам змяшчаюцца газы, у тым ліку метан. Небяспечным па раптоўных выкідах на Старобінскім радовішчы з'яўляецца Трэці калійны гарызонт. У дадзеным выпадку на 22 слупе вялася штатная праходка, папераджальных прыкмет і прадвеснікаў выкідаў не было выяўлена. Звяно рабочых выконвала работы згодна з інструкцыяй.
Як паведамлялася, 9 сакавіка на падземным гоным участку нумар 10 рудніка 3-га рудаўпраўлення ў змену з 11.50 да 18.50 пры выкананні комплексам ПКС-8 нумар 4 зарубкі на тэхналагічную збойку 22-б заходняга слупа гарызонту 620 м адбыўся раптоўны выкід солі і газу. Інтэнсіўнасць выкіду склала каля 600 куб.м горнай масы. Праходчы камбайн і самаходны вагон аказаліся цалкам засыпаны пародай. У ноч з 10 на 11 сакавіка горнаратавальнікамі з-пад завалу выцягнуты машыніст горных выемачных машын Максім Іваноў і горнарабочы ачышчальнага забою Дзмітрый Валькоў 1973 і 1985 гадоў нараджэння. Шахцёры загінулі. Тэхналогія падрыхтоўкі і адпрацоўкі 22-б заходняга слупа з'яўляецца тыпавой, адпрацавана на практыцы і ўнесена ў "Інструкцыю па прымяненні сістэм распрацоўкі на Старобінскім радовішчы". З аналагічнымі параметрамі выканана падрыхтоўка суседняга слупа, дзе завяршае адпрацоўку запасаў сільвініту лава нумар 11н-3. Створана камісія для расследавання прычын і абставін раптоўнага выкіду. На месцы трагедыі працягваюць працаваць следчыя.-0-
