1 жніўня, Мінск /Аліна Грышкевіч - БЕЛТА/. Беларуская зямля дала свету нямала вядомых дзеячаў навукі і культуры. Аб гэтым заявіў міністр замежных спраў Уладзімір Макей 31 ліпеня ў МЗС на мерапрыемстве, прысвечаным 215-годдзю з дня нараджэння вучонага беларускага паходжання Ігната Дамейкі, перадае карэспандэнт БЕЛТА.
"Гэта адзін з самых вядомых сыноў Беларусі, якім мы ганарымся і які ўвасабляе сувязь беларускага народа з іншымі народамі свету, - падкрэсліў кіраўнік МЗС. - Словы асаблівай удзячнасці выказваю нашым паважаным гасцям - прамым наследнікам Ігната Дамейкі, якія прыехалі з Аўстраліі, ЗША і Чылі. Рады вітаць замежных і беларускіх экспертаў, якія вывучаюць спадчыну гэтага вядомага вучонага. Мне прыемна бачыць сярод гасцей прадстаўнікоў дыпкорпуса, у тым ліку з краін, з якімі звязаны лёс нашага знакамітага суайчынніка".
"Беларуская зямля дала свету цудоўных паэтаў і пісьменнікаў, мастакоў і кампазітараў, грамадска-палітычных дзеячаў і вучоных", - адзначыў міністр.
Уладзімір Макей упэўнены, што дзякуючы такім людзям, як Ігнат Дамейка, быў закладзены фундамент нашай нацыянальнай ідэнтычнасці, стала магчымым фарміраванне беларускай нацыі. Ігнат Дамейка быў шматпрофільным вучоным - з лёгкасцю пераходзіў ад геалогіі да батанікі, ад эканомікі да літаратуры, ад геаграфіі да адукацыі. Лёс гэтага чалавека цесна звязаны з Чылі. Чылійскі ўрад лічыць яго нацыянальным героем. Яго чылійскі перыяд жыцця напоўнены напружанай працай, экспедыцыямі ў горы і пустыні, выкладаннем ва ўніверсітэце. Ён аўтар 130 навуковых прац. Па падручніках гэтага аўтара вучыліся многія пакаленні студэнтаў Чылі, Перу, Мексікі.
У Еўропе і Амерыцы больш за 70 помнікаў і мемарыяльных знакаў, якімі ўвекавечаны жыццёвы шлях Ігната Дамейкі.
Шануюць памяць аб Дамейку ў Беларусі. На яго радзіме на Гродзеншчыне ўстаноўлены памятны знак. Яго імем названы вуліцы ў Мінску, Гродне, Баранавічах, Лідзе. Па ініцыятыве Беларусі 2002 год быў абвешчаны ЮНЕСКА Годам Ігната Дамейкі.
У сваю чаргу міністр інфармацыі Беларусі Лілія Ананіч уручыла нашчадкам Ігната Дамейкі першы экзэмпляр выдадзенай у нашай краіне кнігі праўнучкі - Пас Дамейка ў перакладзе на беларускую мову. Кіраўнік ведамства адзначыла, што кніга выдадзена Міністэрствам інфармацыі па ініцыятыве Міністэрства замежных спраў. Яна падкрэсліла важнасць гэтага выдання, якое расказвае аб жыцці і дзейнасці вядомага земляка. Гэтыя кнігі будуць знаходзіцца ў гарадскіх і сельскіх бібліятэках, з імі змогуць пазнаёміцца многія беларусы.
Ігнат Дамейка - дастойны сын беларускай зямлі, адкрытай і міралюбівай, сказаў міністр. На адным з першых экзэмпляраў кнігі, які застанецца ў Беларусі, будуць аўтографы нашчадкаў Ігната Дамейкі, якія прысутнічалі на мерапрыемстве ў МЗС.
Нашчадкі Ігната Дамейкі ў час выступлення ў МЗС адзначылі важнасць для іх гэтага мерапрыемства. Яны былі крануты цеплынёй сустрэчы.
У МЗС была прадстаўлена таксама выстаўка, прысвечаная жыццю, дзейнасці і навуковай спадчыне Ігната Дамейкі.-0-
Фота Аксаны Манчук.
