4 жніўня, Маладзечна /Кар. БЕЛТА/. Беларусь сістэмна працуе над умацаваннем нацыянальных сродкаў масавай інфармацыі, заявіла сёння міністр інфармацыі Лілія Ананіч на рэгіянальным семінары-практыкуме "Інфармацыйнае забеспячэнне сацыяльна-эканамічнага развіцця Мінскай вобласці і задачы сродкаў масавай інфармацыі", перадае карэспандэнт БЕЛТА.
"Сёння сродкі масавай інфармацыі працуюць ва ўмовах жорсткай канкурэнцыі, - адзначыла Лілія Ананіч. - Беларусь адкрыта дэманструе сваю інфармпрастору і пры гэтым сістэмна працуе над умацаваннем нацыянальных сродкаў масавай інфармацыі".
На думку Ліліі Ананіч, рэгіянальныя СМІ - гэта пласт прэсы для кожнага чалавека. Менавіта ў рэгіёнах, ідучы па вуліцы, журналісту можна сустрэць свайго героя, а герою - зайсці ў рэдакцыю і распытаць пра змест газетных старонак.
Газеты павінны быць канкурэнтаздольныя, упэўнена міністр інфармацыі. Неабходна практычная работа кожнай рэдакцыі па сувязі са сваімі чытачамі. На рэгіянальных семінарах вельмі важна гаварыць аб сутнасці журналісцкай работы, падкрэсліла міністр, інфармацыйнае поле сур'ёзна змянілася. Змянілася і якасць журналістыкі.
Лілія Ананіч акцэнтавала ўвагу на тэме, якая цяпер вельмі актуальная для СМІ, - уборачнай кампаніі. Вялікія фота на першай паласе працаўнікоў палёў упрыгожаць газету, яна будзе "дыхаць цяплом". Такую газету захочацца перагледзець не адзін раз. "Менавіта такія выданні і праекты вяртаюцца да чытача. У іх не абязлічаная журналістыка, а якасная, з глыбокай аналітыкай", - падкрэсліла яна.
Рэгіянальны семінар-практыкум "Інфармацыйнае забеспячэнне сацыяльна-эканамічнага развіцця Мінскай вобласці і задачы сродкаў масавай інфармацыі", які сёння прымае Маладзечна, завяршае цыкл падобных мерапрыемстваў у розных абласцях краіны.-0-