19 красавіка, Мінск /Кар. БЕЛТА/. Генпракуратуры Беларусі і Малдовы ўмацуюць супрацоўніцтва ў барацьбе з карупцыяй і незаконным абаротам наркотыкаў. Гэта прадугледжана пагадненнем, якое ў Кішынёве падпісалі кіраўнікі наглядных ведамстваў дзвюх краін Аляксандр Канюк і Эдуард Харунжэн, паведамілі БЕЛТА ў Генпракуратуры Беларусі.
У міжнародным дагаворы рэгламентавана ўзаемадзеянне ў забеспячэнні абароны правоў і свабод грамадзян, барацьбе са злачыннасцю, у тым ліку такімі яе арганізаванымі і транснацыянальнымі формамі, як тэрарызм, экстрэмізм, карупцыя, незаконны абарот зброі, наркатычных сродкаў і псіхатропных рэчываў, гандаль людзьмі. Прадугледжаны абмен вопытам, нарматыўнымі прававымі актамі. Асобныя палажэнні дакумента вызначаюць магчымасць супрацоўніцтва па пытаннях канфіскацыі і вяртання маёмасці, здабытай злачынным шляхам.
"Умацаванне прафесійных сувязей значна ўзмоцніць пазіцыі пракурорскага корпуса ў барацьбе са злачыннасцю, асабліва ў сферы эканомікі і высокіх тэхналогій", - адзначыў Аляксандр Канюк.
Генеральны пракурор Беларусі наведвае Кішынёў у складзе нацыянальнай дэлегацыі на чале з Прэзідэнтам краіны Аляксандрам Лукашэнкам.-0-
