16 ліпеня Мінск /Кар. БЕЛТА/. Беларусь і Еўрапейскі саюз пацвярджаюць прыхільнасць да ўсёабдымнага плана дзеянняў па іранскай ядзернай праграме. Гэта пытанне абмяркоўвалася на сустрэчы намесніка міністра замежных спраў Беларусі Андрэя Дапкюнаса з кіраўніком прадстаўніцтва ЕС у Беларусі Андрэа Віктарын, паведамілі БЕЛТА ў прэс-службе МЗС.
Беларускі бок праінфармавалі аб выніках пасяджэння ў Вене камісіі па сумесным усёабдымным плане дзеянняў па ўрэгуляванні сітуацыі вакол іранскай ядзернай праграмы. У пасяджэнні прынялі ўдзел кіраўнікі знешнепалітычных ведамстваў Германіі, Ірана, Кітая, Расіі, Францыі, а таксама высокі прадстаўнік па замежных справах і палітыцы бяспекі ЕС і міністр па справах Блізкага Усходу і Паўночнай Афрыкі знешнепалітычнага ведамства Вялікабрытаніі.
Андрэй Дапкюнас і Андрэа Віктарын чарговы раз падкрэслілі прыхільнасць Беларусі і Еўрапейскага саюза да сумеснага ўсёабдымнага плана дзеянняў па іранскай ядзернай праграме і значэнне гэтага дакумента для захавання рэгіянальнага міру і бяспекі.
Намеснік міністра адзначыў неабходнасць пошуку практычных шляхоў захавання сумеснага ўсёабдымнага плана дзеянняў і важнасць распрацоўкі і ўзгаднення калектыўных механізмаў супрацоўніцтва, якія маглі б нейтралізаваць наступствы аднабаковых экстэрытарыяльных санкцый.
У час размовы бакі таксама абмеркавалі развіццё ўзаемадзеяння паміж Беларуссю і Еўрапейскім саюзам у галіне абароны правоў чалавека, у тым ліку ў кантэксце ўдзелу беларускіх прадстаўнікоў у саміце "Адкрыты ўрад" у Тбілісі па праблематыцы ўзаемадзеяння грамадзянскай супольнасці і ўлад і маючага адбыцца ў Мінску 17 чэрвеня пятага раўнда двухбаковага дыялогу па правах чалавека.-0-
