1 кастрычніка, Мінск /Кар. БЕЛТА/. БДУ ў ліку ўдзельнікаў міжнароднага праекта COMPASS уключаны ў шорт-ліст намінацыі "Міжнародная калабарацыя года" прэміі Times Higher Education (THE) Awards 2021. Аб гэтым БЕЛТА паведамілі ў прэс-службе ВНУ.
"У Вялікабрытаніі яе неафіцыйна называюць "Оскар у вышэйшай адукацыі". Пападанне ў шорт-ліст ужо з'яўляецца знакам якасці міжнароднай дзейнасці ВНУ - удзельніц сумесных праектаў", - расказалі ў прэс-службе.
Галаўным універсітэтам праекта выступае Кенцкі (Вялікабрытанія), а яго партнёрамі Кембрыджскі ўніверсітэт, Універсітэт АДА (Азербайджанская дыпламатычная акадэмія, Азербайджан), БДУ (Беларусь), Таджыкскі нацыянальны ўніверсітэт (Таджыкістан) і Універсітэт сусветнай эканомікі і дыпламатыі (Узбекістан).
Ініцыятыва COMPASS рэалізуецца з 2018 года і накіравана на развіццё ўстойлівага адукацыйнага і навукова-даследчага патэнцыялу ва ўмовах знешніх уздзеянняў. Праект садзейнічае ўдасканаленню міжнароднага акадэмічнага супрацоўніцтва шляхам узаемадзеяння палітыкаў, практыкаў і вядучых вучоных Цэнтральнай Еўразіі, Вялікабрытаніі і Еўропы. З моманту запуску COMPASS яго ўдзельнікамі выпушчана дзевяць манаграфій і зборнікаў, шэсць спецыяльных выпускаў рэцэнзуемых часопісаў, больш за 100 часопісных артыкулаў і аналітычных аглядаў. Матэрыялы выдадзены на англійскай і рускай мовах на тэмы міжнародных адносін, паліталогіі, сацыялогіі, міграцыі, устойлівасці, культурнай дыпламатыі, рэгіянальнай бяспекі. Пры падтрымцы ўдзельнікаў COMPASS ад БДУ былі арганізаваны буйныя міжнародныя форумы і канферэнцыі, школы маладых даследчыкаў, а таксама распрацаваны вучэбныя праграмы і дысцыпліны. У прыватнасці, у бягучым годзе пры садзейнічанні праекта на гістарычным факультэце БДУ адкрыта новая спецыяльнасць "Рэгіёназнаўства".
Усяго прэмія THE Awards 2021 уключае 20 намінацый. У катэгорыі "Міжнародная калабарацыя года" акрамя ўдзельнікаў праекта COMPASS знаходзіцца яшчэ пяць намінантаў на прэмію. Пераможцаў THE Awards 2021 аб'явяць 25 лістапада ў рамках урачыстай цырымоніі ў Лондане.
Прэмія THE Awards праводзіцца на працягу 17 гадоў лонданскім часопісам Times Higher у розных намінацыях. Сярод іх "Універсітэт года", "Міжнародная калабарацыя года", "Бізнес-школа года", "Выдатны ўклад у роўнасць, разнастайнасць і інклюзіўнасць", "Выдатная падтрымка студэнтаў", "Тэхналагічная або лічбавая інавацыя года". Раней прэмія засноўвалася сярод ВНУ Вялікабрытаніі, а ў бягучым годзе да іх далучыліся і ўніверсітэты Ірландыі.-0-
