12 снежня, Мінск /Кар. БЕЛТА/. Белдзяржуніверсітэт увайшоў у 200 лепшых універсітэтаў па версіі Маскоўскага міжнароднага рэйтынгу "Тры місіі ўніверсітэта" (MosIUR), паведамілі БЕЛТА ў прэс-службе ВНУ.
У спісе пілотнай версіі новага рэйтынгу адзначаны ўніверсітэты з 39 краін. БДУ размясціўся на 168-м месцы і стаў адзіным прадстаўніком Беларусі ў падагульняючай рэйтынгавай табліцы.
Маскоўскі міжнародны рэйтынг ВНУ - прынцыпова новы акадэмічны рэйтынг, які ацэньвае тры ключавыя місіі ўніверсітэта: адукацыйную, навуковую і ўзаемадзеянне з грамадствам. Рэйтынг выкарыстоўвае шэраг крытэрыяў, што разлічваюцца па аб'ектыўных даных, і выключае суб'ектыўныя рэпутацыйныя апытанні. Метадалогія ранжыравання прайшла маштабнае грамадскае абмеркаванне ў Расіі і за мяжой, у якім прынялі ўдзел звыш 100 універсітэтаў.
Верхнія тры пазіцыі ў рэйтынгу займаюць амерыканскія ўніверсітэты: Гарвардскі, Масачусецкі тэхналагічны інстытут і Стэнфардскі ўніверсітэт. Найбольш шырока прадстаўлены таксама ВНУ кантынентальных еўрапейскіх краін (48 універсітэтаў) і ЗША (41). Сярод расійскіх універсітэтаў лідзіруе МДУ імя М. В. Ламаносава, які размясціўся на 25-й пазіцыі. У першай сотні лепшых ВНУ свету таксама размясціліся Санкт-Пецярбургскі дзяржаўны ўніверсітэт (72) і Маскоўскі фізіка-тэхнічны інстытут (73). Усяго ў табліцы рэйтынгу адзначаны 13 расійскіх устаноў вышэйшай адукацыі.
З краін - суседзяў Беларусі ў рэйтынг увайшлі Варшаўскі ўніверсітэт (158), Ягелонскі ўніверсітэт (181), Кіеўскі нацыянальны ўніверсітэт імя Т. Шаўчэнкі (193).-0-
