23 чэрвеня, Мінск /Кар. БЕЛТА/. Грамадскае аб'яднанне, якое аказала гуманітарную дапамогу беларускім яўрэям, урэгулявала пытанне з выплатай падатку. Аб гэтым карэспандэнту БЕЛТА паведаміў дырэктар Дэпартамента па гуманітарнай дзейнасці Кіраўніцтва справамі Прэзідэнта Беларусі Валерый Скакун, каменціруючы інфармацыю ў СМІ аб спагнанні падаходнага падатку з гуманітарнай дапамогі.
Валерый Скакун адзначыў, што Міністэрствам па падатках і зборах дадзена растлумачэнне парадку падаткаабкладання маёмасці, набытай за кошт сродкаў замежнай бязвыплатнай дапамогі. "Грамадскім аб'яднаннем, пра якое гаворыцца ў інфармацыі, з улікам растлумачэнняў МПЗ, пытанне ўрэгулявана. Пісьмовае пацвярджэнне кіраўніка гэтага аб'яднання паступіла ў адрас дэпартамента", - праінфармаваў ён.
"Сёння ў Беларусі ў рамках дзеючага заканадаўства сфарміравана і выбудавана сістэма работы з замежнай бязвыплатнай дапамогай. Такіх зваротаў ад арганізацый, якія аказваюць дапамогу малазабяспечаным грамадзянам, інвалідам, пенсіянерам, у Дэпартамент па гуманітарнай дзейнасці не паступала", - падкрэсліў Валерый Скакун.-0-