21 кастрычніка, Мінск /Кар. БЕЛТА/. Пастаянны прадстаўнік Беларусі пры Аддзяленні ААН і іншых міжнародных арганізацый у Жэневе Юрый Амбразевіч заклікаў больш актыўна выкарыстоўваць тэмы сям'і і моладзі, паведамілі БЕЛТА ў прэс-службе знешнепалітычнага ведамства.
Пастаянным прадстаўніцтвам Беларусі пры ААН і іншых міжнародных арганізацыях у Жэневе ў партнёрстве з Дзіцячым фондам ААН (ЮНІСЕФ) праведзена тэматычная акцыя "Культура, моладзь і міжнароднае супрацоўніцтва". Мерапрыемства прымеркавана да святкавання Года культуры Беларусі ў 2016 годзе і 70-годдзя стварэння ЮНІСЕФ.
Юрый Амбразевіч азнаёміў удзельнікаў з асноўнымі напрамкамі дзяржаўнай палітыкі ў сферы культуры і па справах моладзі. Асаблівы акцэнт быў зроблены на інструментарыі падтрымкі маладых талентаў і інстытута сям'і. "Юрый Амбразевіч заклікаў прысутных дыпламатаў і міжнародных служачых актывізаваць сумесныя намаганні па выкарыстанні гэтых тэм у рабоце міжнародных арганізацый і азнаёміў іх з развіццём адпаведных беларускіх ініцыятыў на пляцоўцы ААН", - расказалі ў прэс-службе.
Прадстаўнік ЮНІСЕФ у сваім выступленні высока ацаніў супрацоўніцтва Беларусі і Дзіцячага фонду ААН, прыцягнуў увагу да поспехаў Беларусі ў сферы падтрымкі мацярынства і дзяцінства, у прыватнасці, да аднаго з самых нізкіх у свеце ўзроўняў мацярынскай і дзіцячай смяротнасці пры родах.
Асобна была прадстаўлена інфармацыя аб краінавай праграме ЮНІСЕФ для Беларусі на 2016-2020 гады. Работа ЮНІСЕФ у бліжэйшыя гады накіравана на садзейнічанне беларускаму ўраду па чатырох асноўных напрамках: стварэнне бяспечнага і падтрымліваючага асяроддзя для дзіцяці, рэалізацыя правоў дзяцей з асаблівасцямі псіхафізічнага развіцця і інваліднасцю, стварэнне спрыяльнага асяроддзя для зніжэння слабаабароненасці падлеткаў і іх паўнацэннага ўдзелу ў прыняцці рашэнняў, вывучэнне становішча дзяцей і ўмацаванне партнёрства па рэалізацыі правоў дзяцей. Плануецца, што ЮНІСЕФ прыцягне ў Беларусь для гэтых мэт больш як $8 млн міжнароднага тэхнічнага садзейнічання.
Гасцямі акцыі сталі кіраўнікі дыпмісій замежных дзяржаў рэгіёна Цэнтральнай, Усходняй Еўропы і краін СНД, прадстаўнікі кіраўніцтва аддзялення ААН у Жэневе і рэгіянальнага офіса ЮНІСЕФ.-0-
