Мабільная версія
ДЗЯРЖОРГАНЫ
Апошнія навіны
Усе навіны

Адміністрацыя Прэзідэнта нацэльвае мясцовыя ўлады на новыя падыходы ў рабоце са зваротамі грамадзян

Грамадства 05.04.2017 | 20:00
У час пасяджэння
У час пасяджэння

5 красавіка, Мінск /Кар. БЕЛТА/. Новыя падыходы ў рабоце са зваротамі грамадзян і юрыдычных асоб абмяркоўваліся сёння на пасяджэнні калегіі Адміністрацыі Прэзідэнта Беларусі, паведамляе карэспандэнт БЕЛТА.

У пасяджэнні прынялі ўдзел службовыя асобы Адміністрацыі Прэзідэнта, КДК, Генпракуратуры, зацікаўленых міністэрстваў і ведамстваў, а таксама, што немалаважна, прадстаўнікі мясцовых органаў улады рознага ўзроўню, якія непасрэдна адказваюць за работу са зваротамі грамадзян. Удзельнікі пасяджэння разгледзелі сітуацыю як у цэлым па краіне, так і на прыкладзе асобных міністэрстваў і рэгіёнаў.

У час пасяджэння

Адзначалася, што ў Беларусі выбудавана сістэма работы са зваротамі: ёсць неабходная прававая база, праводзяцца асабістыя прыёмы грамадзян і прамыя тэлефонныя лініі. "Але разам з тым у кожным раёне, горадзе магчымы і іншыя формы і метады", - упэўнена кіраўнік Адміністрацыі Прэзідэнта Наталля Качанава. Яна прапанавала мясцовым уладам перыядычна сустракацца з людзьмі па месцы іх жыхарства, запрашаць да дыялогу аб праблемах, якія іх хвалююць, узяўшы за аснову вопыт дэпутатаў. І гэта толькі адзін з варыянтаў, а наогул, на яе думку, прымальныя любыя формы работы, якія дадуць магчымасць аператыўна здымаць пытанні.

У час пасяджэння

Наталля Качанава прывяла прыклад са сваёй практыкі. Калі яна была старшынёй Наваполацкага гарвыканкама, яна адказвала на званкі, якія паступалі ёй непасрэдна пасля заканчэння рабочага дня. Нумар тэлефона быў у адкрытым доступе, і дзякуючы гэтаму ўдавалася працаваць на папярэджанне.

Работу на папярэджанне ўдзельнікі калегіі абмеркавалі асобна. Паколькі сам па сабе зварот - гэта ўжо сведчанне нездаволенасці або неразумення дзеянняў улад. Таму на месцах неабходна актыўней і шырэй растлумачваць, колькі сродкаў у раённым, гарадскім бюджэце, куды пойдуць гэтыя грошы і чаму. Практыка паказвае, што ў такіх выпадках у людзей узнікае менш пытанняў, чаму рамантуюць дарогу на суседняй, а не на іх вуліцы. Тое ж і з перспектывамі стварэння новых рабочых месц, развіццём аховы здароўя, адукацыі, ЖКГ.

Адміністрацыя Прэзідэнта ўдзяляе асаблівую ўвагу ўсім зваротам, нягледзячы на тое, што кожны дзень іх паступае ад 100 да 200, а часам даходзіць і да 400. Кожны з іх тут разглядаюць як магчымасць вызначыць слабыя месцы кіраўніцкай сістэмы і выправіць сітуацыю. У Адміністрацыю пішуць практычна аб усім - нават аб цвілі на сценах, дрэннай якасці вады і разбітых дарогах. Тут правялі аналіз зваротаў і прыйшлі да высновы, што такія негатыўныя з'явы, як валакіта, фармалізм, неаднаразовы перанос тэрмінаў, адсутнасць належнага кантролю за выкананнем, усё яшчэ ёсць. Асаблівую заклапочанасць выклікае неабгрунтаваная перасылка зваротаў у органы, на якія грамадзяне і скардзяцца, або туды, дзе скарга паспела пабываць. Найбольшая колькасць парушэнняў фіксуецца на мясцовым узроўні, дзе, па сутнасці, павінны вырашацца практычна ўсе бытавыя праблемы. Неабходна ўмацоўваць таксама міжведамаснае ўзаемадзеянне.

У час калегіі ў Адміністрацыі быў сфарміраваны пакет прапаноў, які накіраваны на ўстараненне існуючых недахопаў. Напрыклад, прапануецца вывучыць мэтазгоднасць стварэння ў Беларусі адзінай рэспубліканскай аўтаматызаванай сістэмы ўліку і апрацоўкі зваротаў. Прапановы будуць дапрацаваны і затым накіраваны ўсім зацікаўленым у якасці інструкцыі да дзеяння. Чакаецца, што гэта дасць магчымасць палепшыць якасць работы са зваротамі грамадзян, у важнейшым напрамку дзяржаўнай палітыкі, якому Прэзідэнт удзяляе асаблівую ўвагу.-0-

Версія для друку
Навіны рубрыкі Грамадства
Надвор'e
Мінск
Баранавічы
Бабруйск
Барысаў
Брэст
Варшава
Вільнюс
Віцебск
Гомель
Гродна
Жлобін
Кіеў
Ліда
Мінск
Магілёў
Мозыр
Масква
Орша
Полацк
Рыга
Санкт-Пецярбург
Салігорск

Інфаграфіка

IV Форум рэгіёнаў Беларусі і Расіі IV Форум рэгіёнаў Беларусі і Расіі прызначаны садзейнічаць пашырэнню кантактаў і ўдасканаленню прававой базы для паскоранага развіцця эканомік дзвюх дзяржаў.