12 сакавіка, Мінск /Аліна Грышкевіч - БЕЛТА/. Дзяржаўны сакратарыят Савета бяспекі ў адпаведнасці з даручэннем Прэзідэнта Беларусі праводзіць праверку Узброеных Сіл. Аб гэтым карэспандэнту БЕЛТА паведамілі ў Дзяржсакратарыяце Савета бяспекі.
Праверка мае комплексны характар з ахопам найбольш важных пытанняў баявой гатоўнасці і штодзённай дзейнасці беларускай арміі. Дзяржаўны сакратар Савета бяспекі Станіслаў Зась 12 сакавіка ўручыў міністру абароны Андрэю Раўкову распараджэнне Прэзідэнта Беларусі на выкананне практычных мерапрыемстваў праверкі.
Пад кантроль падпадаюць падраздзяленні розных відаў і родаў войскаў: разведкі, ракетных войскаў і артылерыі, механізаваных, зенітных ракетных войскаў, авіяцыі, у тым ліку з правядзеннем з імі вучэнняў з баявой стральбой.
Будзе праверана сістэма адмабілізавання войскаў, у тым ліку гатоўнасць сфарміраваць асобную механізаваную брыгаду, а фарміруемая брыгада - на здольнасць самастойна выконваць задачы па прызначэнні. З запасу прызываецца да 2 тыс. ваеннаабавязаных.
Асаблівая ўвага будзе ўдзелена ацэнцы магчымасцей сіл і сродкаў ВПС і войскаў ППА па прыкрыцці адміністрацыйна-прамысловых раёнаў і прадухіленні актаў паветранага тэрарызму. Асобна правяраюцца пытанні воінскай дысцыпліны ў войсках, а таксама стан узбраення і ваеннай тэхнікі ў баявых воінскіх часцях і на базах захоўвання.-0-
