12 верасня, Нью-Дэлі /Уладзімір Мацвееў - БЕЛТА/. Урачыстая цырымонія сустрэчы кіраўніка беларускай дзяржавы Аляксандра Лукашэнкі адбылася ў прэзідэнцкім палацы "Раштрапаці-бхаван" у Нью-Дэлі, перадае карэспандэнт БЕЛТА.
Аўтамабіль Прэзідэнта Беларусі ўехаў на тэрыторыю палаца праз цэнтральныя вароты. Адсюль і да месца сустрэчы з Прэзідэнтам Індыі Рамам Натхам Кавіндам і прэм'ер-міністрам Нарэндрам Модзі аўтамабіль беларускага лідара суправаджаў конны эскорт. У час працэсіі быў дадзены ўрачысты салют у гонар Прэзідэнта Беларусі.
Цырымонія з удзелам роты ганаровай варты таксама ўключала выкананне дзяржаўных гімнаў дзвюх краін. Лідары Беларусі і Індыі прывіталі членаў афіцыйных дэлегацый.
"Я вельмі рады ўжо трэці раз пабываць на гэтай старажытнай свяшчэннай зямлі. У нас устанавіліся вельмі даўнія дружалюбныя адносіны і каранямі яны ідуць у часы СССР. І сёння фундаментам нашых адносін з'яўляецца тое, што ў нас сотні індыйскіх маладых людзей атрымліваюць цудоўную еўрапейскую адукацыю і вяртаюцца на сваю радзіму для таго, каб умацоўваць яе, рабіць незалежнай і суверэннай. У нас ёсць што прапанаваць кіраўніцтву Індыі, з якім у нас склаліся вельмі цёплыя дружалюбныя адносіны. Упэўнены, мы знойдзем сваё месца ў гэтай велізарнай, працвітаючай і перспектыўнай краіне", - заявіў Прэзідэнт Беларусі на цырымоніі.
Прэзідэнцкі палац з'яўляецца асаблівым месцам правядзення пратакольных цырыманіялаў. Ён пабудаваны ў 1929 годзе па праекце англійскага архітэктара. Купал будынка нагадвае купал рымскага Пантэона, а комплекс спалучае некалькі архітэктурных стыляў.-0-
Фота Андрэя Стасевіча
