23 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка заслухаў пашыраны даклад генеральнага пракурора Аляксандра Канюка аб стане крымінагеннай сітуацыі і рабоце органаў пракуратуры, перадае карэспандэнт БЕЛТА.
На мерапрыемстве таксама прысутнічалі прадстаўнікі іншых сілавых структур, кіраўніцтва Адміністрацыі Прэзідэнта і дзяржсакратарыята Савета бяспекі.
Паводле слоў Аляксандра Лукашэнкі, пашыраны фармат мерапрыемства звязаны з глыбокай рэформай у праваахоўнай сістэме, якая нядаўна адбылася ў Беларусі. "Мяне цікавіць работа пракуратуры за гэты перыяд часу, наколькі яна ў новых умовах пасля рэфармавання і структурных пераўтварэнняў эфектыўна функцыянуе", - сказаў Прэзідэнт.
Па выніках даклада Аляксандр Канюк у інтэрв'ю журналістам адзначыў, што ў дзейнасці пракуратуры ёсць тэндэнцыя ўсё большага пераходу пракурорскага нагляду ў эканамічную сферу. "Гэта выклікае пэўныя цяжкасці, гэта трэба ўмець. Прэзідэнт у цэлым нармальна ацаніў стан спраў у органах пракуратуры. Разам з тым, неабходна ўстараніць некаторыя існуючыя недахопы", - падкрэсліў ён.
Акрамя таго, абмяркоўваўся стан крымінагеннай сітуацыі, некаторыя кадравыя пытанні, падрыхтоўка да правядзення ў Мінску ў пачатку верасня каардынацыйнай нарады генеральных пракурораў краін СНД. У ліку найбольш важных для Беларусі пытанняў на гэтым форуме генпракурор абазначыў праблематыку спагнання пратэрмінаванай знешняй дэбіторскай запазычанасці.
Што датычыцца крымінагеннай сітуацыі, то ў параўнанні з мінулым годам яна практычна не змянілася. Разам з тым, у якасці станоўчага моманту Аляксандр Канюк адзначыў меншую колькасць забойстваў. І ў цэлым апошнія 5 гадоў мае месца тэндэнцыя скарачэння злачыннасці.-0-
