20 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка пры назначэнні новага кіраўніцтва ўрада і шэрага міністэрстваў растлумачыў кадравыя рашэнні, якія здаюцца жорсткімі пасля наведвання Аршанскага раёна, паведамляе карэспандэнт БЕЛТА.
"Калі я прымаў рашэнні ў Оршы, многія або асобныя у грамадстве гэта ўспрынялі як нейкае спантаннае рашэнне. А некаторыя так падумалі, што, можа, не варта было за адно мерапрыемства Аршанскага рэгіёна так жорстка крытыкаваць урад. Дык вось я хачу сказаць: справа не толькі ў Оршы. Гэта апошняя кропля, якая перапоўніла чашу цярпення. Галоўнае - у глыбіні. І вы, людзі, недалёкія ад урада (а некаторыя працавалі на гэтых пасадах, няхай не на першых ролях), разумееце, што не можа быць ніякіх рознагалоссяў і розначытанняў у правядзенні курсу развіцця нашай краіны", - заявіў беларускі лідар.
Як адзначыў кіраўнік дзяржавы, у Беларусі ўзяты пэўны курс. "У адпаведнасці з канстытуцыяй краіны Прэзідэнт у сваёй перадвыбарнай праграме абвяшчае гэты курс. І людзі зыходзячы з гэтага галасуюць. І нікому не дазволена падманваць людзей", - падкрэсліў Аляксандр Лукашэнка.
"А ў нас ва ўрадзе, не буду называць прозвішчы, было так: давайце мы вось курс гэты заявім, а потым будзем праводзіць іншы курс (у іншых жа краінах так робіцца). Так у мяне ніколі не было і не будзе! Тое, што мы людзям абяцалі, а ўрад быў створаны менавіта пад гэты курс, той курс павінен і праводзіцца. І галоўнае ў нашай палітыцы - народ. Гэта ніякі не папулізм. Я заўсёды гэта казаў і кажу. У адваротным выпадку нам у гэтай краіне рабіць няма чаго. Людзі - гэта галоўнае", - заявіў беларускі лідар.
Аляксандр Лукашэнка падкрэсліў, што дысцыпліна, прыстойнасць, згуртаванасць, сістэма ўлады, нацэленая на дысцыпліну і прафесіяналізм, - гэта фактар незалежнасці краіны. "Таму другі напрамак - гэта незалежнасць, забеспячэнне гэтай незалежнасці. Мы будзем незалежнымі, калі ў нас эканоміка будзе развівацца так, як мае быць. Калі мы абвалім эканоміку, ніякай незалежнасці быць не можа", - сказаў кіраўнік дзяржавы.
Прэзідэнт адзначыў, што некаторыя ва ўрадзе пачалі разумець гэта інакш, маўляў, давайце хутчэй прыватызуем дзяржаўную ўласнасць, хутчэй распрададзім. "І прытым ніхто не супраць прыватызацыі. Было дакладна мною вызначана. Па кожным прадпрыемстве, малым ці вялікім, па працоўных калектывах - там людзі жывуць і працуюць - мы павінны вызначацца, перш чым прадаваць акцыі гэтага прадпрыемства", - дадаў беларускі лідар. У тым ліку трэба вызначацца па пытаннях, на якіх умовах прыйдуць новыя інвестары, што будзе з прадпрыемствам і яго работнікамі.
"Ці выкінуць яны палову на вуліцу людзей, як некаторыя прыходзяць да мяне інвестары і кажуць, што такая колькасць не патрэбна: "Мы гэтых звальняем, пакідаем ад буйной кампаніі кукіш, як у народзе кажуць". Такая прыватызацыя ў Беларусі не пройдзе, такая прыватызацыя нам не патрэбна", - падкрэсліў Прэзідэнт.
"Мы што, хочам пайсці па шляху нашых суседзяў? Дык яны ўжо асудзілі такую прыватызацыю, якая праводзілася ў 90-х", - заўважыў беларускі лідар.
Аляксандр Лукашэнка дадаў, што ў Беларусі быў вызначаны курс на паступовую мадэрнізацыю і ўдасканаленне таго, што ёсць. "А тое, што ў нас ёсць сёння, вырабляе тое, што запатрабавана на рынку. Дык чаму ад гэтага адмаўляцца?" - задаў рытарычнае пытанне Прэзідэнт.
Ён прывёў у прыклад сельскую гаспадарку, адносна якой раней гаварылі, што ў гэту сферу дарэмна ўкладваюцца сродкі. "Сёння ўсе гавораць: ведаеце, сельская гаспадарка выратавала краіну, - звярнуў увагу беларускі лідар. - Комплексы малочнатаварныя будавалі, перараблялі дапатопныя фермы. Сёння ўсе кажуць: малочка - гэта золата. Гэта не мае словы, гэта словы спецыялістаў".
Аналагічная сітуацыя і ў выпадку мадэрнізацыі прадпрыемстваў дрэваапрацоўчай галіны. "Сёння яны асноўны драйвер развіцця нашай эканомікі. Па-мойму, 124-125 працэнтаў росту да ўзроўню мінулага года паказваюць", - сказаў Аляксандр Лукашэнка.
"Вось такая паступовая спакойная мадэрнізацыя павінна быць. І калі ўжо давядзецца нешта прадаваць з сельскай гаспадаркі або дрэваапрацоўкі, цана гэтым прадпрыемствам будзе значна вышэйшая", - заявіў Аляксандр Лукашэнка.
"Але самае галоўнае - з першых сваіх крокаў, з'яўляючыся Прэзідэнтам, яшчэ зялёным Прэзідэнтам у тыя гады, дакладна было сказана: ніякай шокавай тэрапіі, ніякіх шокаў быць не павінна. Таму што шок - гэта рэзаць па жывым людзей. Я на гэта ніколі не згаджаўся і ніколі не пайду. Рэзаць па жывым нікому ў Беларусі не дадзена. У нас, па-першае, людзі іншыя, якія прывыклі да сумленнасці і справядлівасці. Яны такую палітыку не ўспрымуць. Не, ва ўрадзе не так, дык гэтак трэба агулам прасунуць гэты шок. І мне давялося пастаянна спыняць урад", - сказаў Прэзідэнт.
У той жа час даручэнне ўраду дасягнуць хаця б Br1 тыс. сярэдняй зарплаты па краіне "ў іх наогул выклікала паніку, што гэта недапушчальна", расказаў кіраўнік дзяржавы. "Аказваецца, дапушчальна. Нават пры тым курсе, які яны спрабавалі навязаць нам у Беларусі. Але колькі крыві папсавалі для таго, каб (асабіста мне давялося гэта рабіць) пераканаць урад, што людзі хаць б няшчасныя тысячу рублёў сярэднюю зарплату ў краіне павінны мець. Што трэба падцягнуць у гэтым годзе самыя нізкааплатныя слаі (нянечкі ў дзіцячых садах, медыцынскія сёстры і нянечкі ў бальніцах, якія носяцца з дзецьмі і з намі, калі мы прыхварэем, людзі культуры, сацыяльнага абслугоўвання). Іх трэба сёння падцягваць вышэй. Адны фармулёўкі "мы не можам", "мы не павінны", "абваліцца курс", "абваліцца краіна", "абваліцца ўсё", - прадоўжыў кіраўнік дзяржавы.
"Добра, я прапанаваў альтэрнатыву. Давайце тады разам з вамі будзем мець тую зарплату, якую маюць гэтыя няшчасныя нянечкі", - сказаў Аляксандр Лукашэнка.
Паводле яго слоў, на гэту прапанову была наступная рэакцыя: "Ды не, ва ўрадзе гэта немагчыма, трэба менеджарам ва ўрадзе паднімаць заработную плату, і чым вышэй, тым лепш яны будуць працаваць. Дык што ж гэта за справядлівасць?" - абурыўся кіраўнік дзяржавы.
"Далей - больш. Вядзём перагаворы з міжнароднымі арганізацыямі, у прыватнасці з МВФ. Зразумелы іх патрабаванні. Міжнародны валютны фонд праводзіць пэўную палітыку, і тут нікуды не дзенешся", - адзначыў Прэзідэнт.
Разам з тым нават не з падачы МВФ, а з "падачы дзеячаў ва ўрадзе" пачалі гучаць прапановы аб тым, каб ігненна падняць да 100 працэнтаў аплату насельніцтвам паслуг ЖКГ, прыватызаваць усю дзяржуласнасць. "Што мы атрымалі б? Мінімум - нездаволенасць народа і неплацяжы. Людзі не змаглі б аплаціць той узровень камунальных паслуг, які быў бы прад'яўлены. Таму дакладна быў дадзены мною адказ на гэта пытанне ў ходзе яшчэ перадвыбарнай кампаніі: па меры росту заработнай платы мы будзем пакрыху павялічваць плату за камунальныя паслугі з боку насельніцтва. І дамовіліся - $5 штогод. Не, гэтага мала, і пачынаецца цяганіна на ўвесь свет. Так вяліся перагаворы з МВФ. Прэзідэнт ставіць адну задачу, а тут зноў спрабуюць прасунуць ва ўрадзе, ды і Нацыянальным банку, не кіем, дык палкай гэту так званую ліберальную пазіцыю, бесталковую пазіцыю", - адзначыў беларускі лідар.
Ён расказаў, што яму давялося ўмешвацца, запрашаць прадстаўнікоў МВФ і заяўляць ад імя Беларусі, якім шляхам краіна будзе рухацца далей і весці перагаворы з міжнароднымі арганізацыямі. "І, паглядзіце, многія міжнародныя арганізацыі і банкі, ЕБРР разумеюць нас, крэдытуюць. Таму што мы абавязковыя людзі. Калі мы пазычылі, мы вяртаем гэтыя сродкі. І ніякай цяганіны", - канстатаваў кіраўнік дзяржавы.
"Але цяганіна і безадказнасць сталі краевугольным каменем работы ва ўрадзе. Толькі засталося павесіць пад імі лозунг: "Мы самыя разумныя і вялікія!" На любую прапанову, якая датычыцца жыцця нашага грамадства і жыцця нашых людзей, - адказы: "гэта не можам", "гэта не патрэбна", "задушыць" і гэтак далей. Гэты курс недапушчальны", - падкрэсліў Аляксандр Лукашэнка.
Ён адзначыў, што да некаторага часу гэта было цярпіма. "Але калі перасталі выконваць даручэнні, якія дадзены Прэзідэнтам публічна, калі ў выніку народ глядзіць і думае: так, Прэзідэнт жа даручыў, чаму ж яго ўрад не выконвае... Вось гэта і было апошняй кропляй, якая перапоўніла гэту чашу", - заявіў Прэзідэнт.
"Прытым я паводзіў сябе абсалютна сумленна ў адносінах да гэтых службовых асоб. Два гады таму паставіўшы задачу, я два гады паўтараў ім і расказаў ужо, што трэба рабіць. Атрымліваецца так: задачу Прэзідэнт паставіў, потым расказаў, як выконваць гэту задачу... Бачыць, што не выконваецца, - пайшоў выконваць сам. У такім выпадку навошта такі ўрад?" - рэзюмаваў кіраўнік дзяржавы.-0-
