28 сакавіка, Мінск /Кар. БЕЛТА/. Прэзідэнт Беларусі Аляксандр Лукашэнка зробіць 29-31 сакавіка афіцыйны візіт у Туркменістан, паведамілі БЕЛТА ў прэс-службе беларускага лідара.
Кіраўнік дзяржавы 30 сакавіка правядзе перагаворы з Прэзідэнтам Туркменістана Гурбангулы Бердымухамедавым, якія пройдуць у фармаце сам-насам, а затым у пашыраным складзе. Бакі плануюць абмеркаваць шырокі спектр пытанняў, якія ўяўляюць узаемны інтарэс. Асаблівая ўвага будзе ўдзелена развіццю гандлёва-эканамічнага супрацоўніцтва. Па выніках перагавораў чакаецца падпісанне шэрага двухбаковых дакументаў.
Плануецца, што лідары дзвюх краін таксама прымуць удзел у цырымоніі адкрыцця комплексу будынкаў пасольства Беларусі ў Туркменістане.
На наступны дзень Аляксандр Лукашэнка і Гурбангулы Бердымухамедаў наведаюць Гарлыкскі горна-абагачальны камбінат, будаўніцтва якога было нядаўна завершана беларускім бокам. Кіраўнікі дзяржаў ва ўрачыстай абстаноўцы дадуць старт рабоце завода, а затым азнаёмяцца з вытворчасцю.-0-
