2 жніўня, Мінск /Уладзімір Мацвееў - БЕЛТА/. Прэзідэнт Беларусі Аляксандр Лукашэнка заклікаў не займацца самападманам у пытанні нарыхтоўкі і забеспячэння захаванасці кармоў для жывёлагадоўлі. Аб гэтым кіраўнік дзяржавы заявіў сёння на рэспубліканскай селектарнай нарадзе па пытаннях уборкі ўраджаю, перадае карэспандэнт БЕЛТА.
Сітуацыяй у гэтай сферы Аляксандр Лукашэнка пацікавіўся ў старшыні Брэсцкага аблвыканкама Анатоля Ліса. "У вас бурты, курганы, колькі іх у вобласці: сянаж, сілас?" - спытаў Прэзідэнт.
"На жаль, яны ў нас ёсць", - канстатаваў губернатар, адзначыўшы, што існуючыя траншэі дазваляюць нарыхтаваць большую частку кармоў.
"Якая ў вас патрэбнасць? Не трэба мне гэтыя вашы лічбы, - рэзка адрэагаваў Прэзідэнт. - Колькі вам трэба ў вобласці траншэй з улікам таго, што вы перайшлі на нарыхтоўку ў палімерную плёнку сенажу і сіласу?"
"Яшчэ трэба 300 траншэй. Мы пабудавалі 150. У 2016 годзе - 125, у 2017-м - 26, і 40 заканчваем будаваць", - далажыў Анатоль Ліс.
"Давайце дамовімся так: гэты і наступны год - у краіне праблема з траншэямі павінна быць знята. Дзесьці трэба нейкія падняць на ўзровень, перабудаваць. Таму што я бачыў вашы траншэі. Для вас гэта менш характэрна, для іншых - вельмі характэрна: яны закапаны на 2 м у яму. І як толькі дождж нейкі, снег і іншае, там стаіць вада. Мінімум метр кармоў не проста кіслыя, яны згніюць, калі вы не паспееце іх дастаць адтуль. Вы ведаеце, пра што ідзе размова. Таму трэба праінспектаваць у кожнай вобласці ўсе траншэі", - даручыў Прэзідэнт.
"Гэта - якасць кармоў, здароўе жывёл. Таму траншэі, якія непрыдатныя, трэба іх дастаць з зямлі і перарабіць, паставіць у патрэбным месцы. Там, дзе трэба (замест курганоў вашых і буртоў), пабудаваць новыя траншэі. У вас, Андрэй Уладзіміравіч (прэм'ер-міністр Андрэй Кабякоў. - Заўвага БЕЛТА), гэты і наступны год. У адваротным выпадку не трэба нарыхтоўваць травяністыя кармы там, дзе вы кладзяце іх у бурты. Гэта - гніллё, атрута для жывёлагадоўлі", - падкрэсліў Аляксандр Лукашэнка.
Паводле слоў кіраўніка дзяржавы, неабходна ўзяць адпаведнае пытанне штурмам, як у свой час было зроблена адносна будаўніцтва сховішчаў для бульбы. "Калі пабудавалі бульбасховішчы, бульба стала рэнтабельнай, таму што мы маем магчымасць прадаць яе ў красавіку-маі. Гэтак жа і з траншэямі трэба разабрацца", - сказаў ён.
"Самі сябе падманваем. Нарыхтоўваем, называецца, кармы. І ў бурты кладзём. На кантроль гэта пытанне ўсім памочнікам. У будучым годзе ўсе траншэі павінны быць у страі. На жалезны кантроль гэта пытанне, і трэба раз і назаўсёды зняць яго", - рэзюмаваў беларускі лідар.-0-
