10 красавіка, Мінск /Міхаіл Маціеўскі - БЕЛТА/. Задача новага закона аб сродках масавай інфармацыі - абараніць людзей ад дэструктыўнай інфармацыі. Аб гэтым Прэзідэнт Беларусі Аляксандр Лукашэнка заявіў сёння на сустрэчы з кіраўнікамі і калектывамі буйнейшых дзяржаўных СМІ краіны, перадае карэспандэнт БЕЛТА.
Гаворачы аб задачах, якія сёння стаяць перад сродкамі масавай інфармацыі, кіраўнік дзяржавы адзначыў, што частка з іх адлюстравана ў новым законе аб СМІ. У прыватнасці, размова ідзе аб развіцці айчыннага кантэнту на тэлебачанні. Пры гэтым сам закон, падкрэсліў Аляксандр Лукашэнка, прызначаны "абараніць нашых людзей ад патоку неправеранай, непраўдзівай, дэструктыўнай інфармацыі".
Паводле слоў Прэзідэнта, сёння ўсё больш запатрабаванай становіцца якасная журналістыка з аўтарскай пазіцыяй, дакладнымі фактамі, глыбокай аналітыкай. "Абудзіць цікавасць, утрымаць чытачоў, гледачоў - гэта ваша задача. Разумна расстаўце прыярытэты і падумайце аб тэматычнай, жанравай разнастайнасці тэлеканалаў, газет, каб прыцягнуць людзей розных узростаў і настрояў", - арыентуе СМІ кіраўнік дзяржавы.
На яго думку, дастаць моладзь з тэлефонаў і камп'ютараў і прымусіць чытаць газету ўжо наўрад ці атрымаецца. "Але ў такім выпадку ў інтэрнэце мы павінны прапанаваць ім нешта цікавае, правільнае і аб'ектыўнае", - сказаў Аляксандр Лукашэнка.
Прэзідэнт адзначыў, што адобрыў, каб у парламенце абмяркоўвалася пытанне змяненняў у закон аб сродках масавай інфармацыі з удзелам прадстаўнікоў СМІ. "Вы павінны для сябе зрабіць гэты закон. Калі ён да мяне паступіць, я хачу, каб вы былі задаволены гэтым законам. А калі і яны, якія мне задаюць гэта пытанне, - гэта для мяне шчасце. Няважна, што яны за мяне не галасавалі, але я Прэзідэнт усяго беларускага народа, і я гатовы ўлічваць усе інтарэсы", - сказаў беларускі лідар.
Ён падкрэсліў, што плануемыя змяненні неабходна абмяркоўваць. "Але галоўнае, каб усе працавалі ў роўных умовах, каб канкурыравалі. Нехта з вас выходзіць на экран і гаворыць адкрыта, сумленна. Усе бачаць, камусьці падабаецца, камусьці не... А чаму хтосьці хаваецца за нейкі кручок. Чаму ён у інтэрнэце адкрыта недзе не напіша і не паставіць свой подпіс. Чаго ты баішся?" - задаў рытарычнае пытанне Аляксандр Лукашэнка.
Прэзідэнт заклікаў усіх адкрыта выказваць сваю пазіцыю і абмяркоўваць праект змяненняў у закон. Але разам з гэтым будзе захоўвацца кантроль за тым, каб не распаўсюджвалася інфармацыя тэрарыстычнага плана і заклікі або папулярызацыя іншых негатыўных працэсаў.-0-
