Сцяг Чацвер, 28 сакавіка 2024
Усе навіны
Усе навіны
Прэзідэнт
24 жніўня 2017, 12:50

Лукашэнка выступае за ўдасканаленне сістэмы адукацыі, а не яе ломку

24 жніўня, Мінск /Міхаіл Маціеўскі - БЕЛТА/. Сістэму беларускай адукацыі неабходна ўдасканальваць, а не ламаць. Аб гэтым Прэзідэнт Беларусі Аляксандр Лукашэнка заявіў сёння на пленарным пасяджэнні Рэспубліканскага педагагічнага савета, перадае карэспандэнт БЕЛТА.

"Вы ведаеце мае падыходы па пераўтварэнні, удасканаленні, недзе рэфармаванні сістэмы нашай адукацыі. Сутнасць гэтых падыходаў у тым, што я катэгарычна супраць нейкай ломкі, нават рэфармавання ў поўным сэнсе гэтага слова сістэмы адукацыі, - сказаў Аляксандр Лукашэнка. - Я заўсёды выступаў і выступаю за ўдасканаленне таго ці іншага працэсу. Трэба ісці ад жыцця, трэба вырашаць тыя пытанні, якія ставіць жыццё. Адукацыя - настолькі складаны працэс (і мы з вамі ведаем гэта не па чутках), што ўзяць і нешта зламаць, асабліва ў цэлым сістэму адукацыі, і выбудаваць новую не атрымаецца".

Прэзідэнт звярнуў увагу, што ў свой час некаторыя краіны, асабліва падобныя на Беларусь, вырашылі поўнасцю перабудаваць сферу адукацыі. Але, зламаўшы старое, новае з-за многіх прычын яны так і не стварылі. "Сёння прызнаюць, што, зламаўшы старое, не атрымалі ў спадчыну тое добрае, што было. Мы гэтым шляхам не пайшлі", - адзначыў ён.

"Больш таго, вы, напэўна, помніце, што да нас, да сярэдзіны 1990-х, улады Беларусі паспрабавалі ісці гэтым шляхам. Яны за два-тры гады спрабавалі навучыць усіх нас размаўляць на той мове, на якой яны хочуць (я абсалютна тут не выступаю супраць роднай беларускай мовы, ні ў якім разе). Вы самі ведаеце, што было ў тыя гады: пачалі ламаць усё без разбору. І дакладныя навукі, і прыродазнаўства, гуманітарныя напрамкі нашай адукацыі. Нам давялося спыняць гэты працэс. Тады мы са многімі з прысутных у гэтай зале адчулі, што можам разбурыць усё дашчэнту. А для таго, каб стварыць пасля гэтага нешта новае, патрэбны каласальныя грошы. Тады грошай наогул не было. Наогул. Я не разумею, на што спадзяваліся тыя, хто быў на чале ўлады ў Беларусі, ідучы на карэнную ломку адукацыі. Таму, з якога боку ні паглядзі, мы пачалі рухацца ў няправільным напрамку. І тады, спыніўшы гэты працэс і ў палітыцы, і ў адукацыі, наладжваючы новае жыццё ў новай дзяржаве, быў вылучаны тэзіс аб удасканаленні, аб тым, каб не страціць тое лепшае, што мы накапілі", - нагадаў кіраўнік дзяржавы.

Аляксандр Лукашэнка звярнуў увагу: калі прымалася рашэнне, на якой мове павінна весціся навучанне ў школах, кіраўніцтва краіны ішло ад народа. "Мы сілай не націскалі: давай "беларускую мову" і да таго падобнае. Мы ішлі і ідзём ад жыцця. Калі б мы пайшлі тым шляхам, як "рэфарматары" пасля распаду Савецкага Саюза, мы сёння не мелі б ні адной, ні другой мовы, - выказаў меркаванне ён. - Руская мова - гэта наша родная мова. Калі нехта яе лічыць расійскай, у нас з вамі розныя падыходы да гэтай мовы. Гэта наша родная мова. Можа, калі можна так казаць, крыху менш родная, чым беларуская. А ўвогуле, я іх стаўлю на адзін узровень і лічу, што ад гэтай спадчыны адмаўляцца нам ні ў якім разе нельга, інакш мы страцім многае. Давайце будзем багатымі людзьмі. Няхай у нас будзе дзве родныя мовы - руская і беларуская. Пройдзе час, прыйдуць новыя людзі, новыя пакаленні, можа, жыццё зменіцца, і яны вызначацца, на якой мове размаўляць".

Прэзідэнт растлумачыў, чаму менавіта цяпер было вырашана правесці на такім высокім узроўні Рэспубліканскі педагагічны савет. "Адзін этап мы прайшлі - я яго называў. Потым, удасканальваючы нашу адукацыю, мы прайшлі другі этап, калі можна падзяліць гэта на этапы. Убачыўшы ўсе недахопы, прапусціўшы іх праз сябе, вось цяпер мы ўбачылі праблемы, якія яшчэ не вырашылі. Г.зн. мы напярэдадні нейкага трэцяга этапу. Можа быць, асноўнага ў плане ўдасканалення нашай адукацыі. Мы з вамі павінны параіцца, як будзем вырашаць пытанні, якія паўсталі перад адукацыяй ва ўвесь рост. Нам трэба зрабіць новы крок у дашліфоўцы, удасканаленні нашай адукацыі: дашкольнай, школьнай, прафесійна-тэхнічнай, вышэйшай", - рэзюмаваў ён-0-

Падпісвайцеся на нас у
Twitter
Топ-навіны
Свежыя навіны Беларусі