13 снежня, Мінск /Юлія Дылянок - БЕЛТА/. Вучоным-медыкам неабходна больш актыўна асвойваць новыя тэхналогіі. Аб гэтым Прэзідэнт Беларусі Аляксандр Лукашэнка заявіў на II З'ездзе вучоных, перадае карэспандэнт БЕЛТА.
"Вучоным-медыкам неабходна больш актыўна асвойваць новыя тэхналогіі, распрацоўваць і ўкараняць сучасныя скрынінгавыя праграмы, працаваць над патанненнем прадастаўляемых медыцынскіх паслуг", - адзначыў Аляксандр Лукашэнка.
Паводле яго слоў, важнейшай задачай, якая стаіць перад медыцынскай навукай, з'яўляецца паляпшэнне дэмаграфічнай сітуацыі. Нягледзячы на дасягненні ў гэтай сферы, застаецца нявырашаным шэраг праблем. "На жаль, для лячэння некаторых захворванняў беларусы вымушаны ехаць за мяжу. Па-ранейшаму ёсць пытанні да дыягностыкі, даступнасці і кошту складаных аперацый, прафілактычных мерапрыемстваў", - сказаў Прэзідэнт.-0-
