24 красавіка, Мінск /Кар. БЕЛТА/. Прэзідэнт Беларусі Аляксандр Лукашэнка патрабуе перш за ўсё ўстараняць прычыны карупцыі, а не змагацца з яе вынікам. Аб гэтым кіраўнік дзяржавы заявіў сёння ў Пасланні беларускаму народу і Нацыянальнаму сходу, перадае карэспандэнт БЕЛТА.
Прэзідэнт адзначыў, што механізмаў для процідзеяння карупцыі ў Беларусі сёння дастаткова. Антыкарупцыйны закон, прыняты ў 2015 годзе, на думку экспертаў, стаў самым жорсткім на постсавецкай прасторы. Наладжана эфектыўная работа праваахоўных структур: утаіць факты злачыннай дзейнасці становіцца ўсё складаней і складаней.
"Вельмі шкада, што мы па-ранейшаму змагаемся з вынікам, а не з прычынай гэтай з'явы. Калі ўзбуджаем крымінальную справу - "б'ём па руках" нахабных дзялкоў, па сутнасці, рэагуем на ўчынены факт. А трэба ўстараніць менавіта прычыны - папярэдзіць карупцыйныя праявы", - падкрэсліў Аляксандр Лукашэнка.
Гэта, звярнуў увагу кіраўнік дзяржавы, ужо непасрэдны абавязак кіраўнікоў любога ўзроўню, міністр гэта, дырэктар дэпартамента ці старшыня выканкама. "Менавіта кіраўнік павінен забяспечыць прыняцце эфектыўнага комплексу мер па процідзеянні карупцыі. Не проста для птушкі стварыць адпаведную камісію, а арганізаваць яе работу з улікам спецыфікі прадпрыемства і працоўнага калектыву. Менавіта ён павінен забяспечыць адзіныя для ўсіх правілы ажыццяўлення дзейнасці ў курыруемай галіне і празрыстасць у рабоце падначаленых службовых асоб", - сказаў Прэзідэнт.
Аляксандр Лукашэнка расказаў аб правапарушэннях нават у Дзяржаўнай інспекцыі аховы жывёльнага і расліннага свету пры Прэзідэнце. "Сталі нахабнымі да такой ступені, што браканьеры сярод рыбаловаў і паляўнічых там з'явіліся", - адзначыў беларускі лідар.
Паводле яго слоў, рыбу фурай вывозілі і развозілі яе па Мінску. "Вы што звар'яцелі там? Ці мне прымаць жорсткія меры, як у першыя гады свайго прэзідэнцкага жыцця? - спытаў кіраўнік дзяржавы. - Прытым мы ж не забараняем ні рыбалку, ні паляванне - ідзіце палюйце і рыбачце паводле закону, па правілах".-0-
