23 мая, Мінск /Уладзімір Мацвееў - БЕЛТА/. Прэзідэнт Беларусі Аляксандр Лукашэнка падарыў атрыманы ад Папы Рымскага памятны медаль удзельніцы тэлепраекта "Голас" Патрыцыі Курганавай, перадае карэспандэнт БЕЛТА.
Адбылося гэта ў час наведвання кіраўніком беларускай дзяржавы музея Ватыкана, дзе разгарнулася выстава беларускіх ікон XVII-XXI стагоддзяў.
Пры ўваходзе на экспазіцыю Аляксандра Лукашэнку сустракалі Мітрапаліт Мінска-Магілёўскай архіепархіі Рымска-каталіцкай царквы архібіскуп Тадэвуш Кандрусевіч і настаяцель мінскага праваслаўнага прыхода Храма-помніка ў гонар Усіх Святых протаіерэй Фёдар Поўны. Разам яны спыніліся паслухаць песнапенні ў выкананні хору "Усіхсвяцкі". Па запрашэнні Фёдара Поўнага разам з хорам выступіла і Патрыцыя Курганава. Яна вельмі пранікнёна выканала "Авэ Марыю", пасля чаго Аляксандр Лукашэнка папрасіў суправаджаючых асоб перадаць яму памятны медаль пантыфіка, які ён уручыў Патрыцыі.
Журналісты не чулі тых слоў, якія сказаў выканаўцы Аляксандр Лукашэнка, але пазней аб гэтым расказала сама Патрыцыя. "Ён сказаў, што яму гэты медаль падарыў Папа Рымскі, а ён дорыць мне, каб ён быў са мной", - сказала дзяўчына.
"Мы не вельмі доўга рэпетыравалі. Таму я перажывала, але ўсё атрымалася добра", - сціпла дадала Патрыцыя.-0-
