27 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка 27 чэрвеня наведаў спаборніцтвы па веславанні на байдарках і каноэ II Еўрапейскіх гульняў, перадае карэспандэнт БЕЛТА.
Кіраўнік дзяржавы сачыў за спаборніцтвамі сярод іншых балельшчыкаў на трыбунах. Беларускія весляры ў сваю чаргу і ў гэты дзень спаборніцтваў змаглі пацвердзіць высокае спартыўнае майстэрства. Скарбонка беларускіх медалёў на Еўрапейскіх гульнях, нягледзячы на складаныя ўмовы надвор'я, папоўнілася золатам Арцёма Козыра і Алены Наздровай, якія занялі першыя месцы ў веславанні на каноэ на спрынтарскай дыстанцыі 200 м. Яшчэ адно золата заваявала сёння Марына Літвінчук у заездзе на 5000 м.
"Шмат балельшчыкаў на трыбунах, Прэзідэнт прыехаў паглядзець на наша выступленне, таму старалася ўся каманда", - падзяліўся эмоцыямі з журналістамі Арцём Козыр.
Кіраўнік дзяржавы з цеплынёй паразмаўляў са спартсменамі, пажадаўшы далейшых перамог ужо на маючай адбыцца ў 2020 годзе Алімпіядзе ў Токіа. Чэмпіёнка II Еўрапейскіх гульняў Марына Літвінчук зрабіла з кіраўніком дзяржавы памятнае сэрфі, атрымаўшы ад яго ў падарунак каробку з шакаладнымі цукеркамі.
Не пакінуў Прэзідэнт без увагі і валанцёраў, якія актыўна задзейнічаны на ўсіх спартыўных пляцоўках. "Дзякуй, працаўнікі!" - сказаў ён.
Паразмаўляў Аляксандр Лукашэнка і з іншымі балельшчыкамі, для якіх прысутнасць на трыбунах Прэзідэнта стала прыемным сюрпрызам і дабавіла эмоцый ад спартыўных перамог. Людзі фатаграфаваліся з кіраўніком дзяржавы. А маленькаму дзіцяці, якое глядзела спаборніцтвы на руках у сваіх бацькоў, Прэзідэнт падарыў плітку шакаладу.
Кіраўнік дзяржавы ў час наведвання спаборніцтваў таксама коратка паразмаўляў з прадстаўніком Польскага агенцтва друку, які пацікавіўся ў Прэзідэнта яго ўражаннямі. Аляксандр Лукашэнка пажадаў, каб наступныя Еўрапейскія гульні ў Кракаве прайшлі не горш, чым у Мінску. "І рыхтуйцеся. Мы прыедзем самым моцным складам. Мы павінны сваіх суседзяў там трошкі ўзварухнуць. Па-спартыўнаму, вядома. Прывітанне сябрам нашым", - сказаў беларускі лідар.-0-
