31 ліпеня, Мінск /Кар. БЕЛТА/. Мірныя сустрэчы ваенных на трэніровачных пляцоўках - лепшы доказ даверу паміж дзяржавамі і іх ўзброенымі сіламі. Аб гэтым Прэзідэнт Беларусі, Галоўнакамандуючы Узброенымі Сіламі Аляксандр Лукашэнка заявіў у прывітанні арганізатарам, удзельнікам і гасцям Армейскіх міжнародных гульняў "АрМІ-2017", якое трансліравалася 29 ліпеня ў час урачыстага адкрыцця спаборніцтваў у Падмаскоўі, перадае карэспандэнт БЕЛТА.
"Вітаю вас і віншую з пачаткам традыцыйных спаборніцтваў, якія ўжо атрымалі нефармальную назву Ваеннай алімпіяды. У такім саперніцтве глыбокі сэнс. Бо, пагадзіцеся, больш прывычна бачыць людзей са зброяй у руках на магутнай ваеннай тэхніцы на полі бою. Таму мірныя сустрэчы ваенных на трэніровачных пляцоўках - лепшы доказ даверу паміж дзяржавамі і іх ўзброенымі сіламі", - падкрэсліў Аляксандр Лукашэнка.
"Сёння гэта асабліва актуальна. У свеце неспакойна. Міжнародны тэрарызм пагражае ўсім без выключэння дзяржавам. На жаль, і агульная абстаноўка ў сусветнай супольнасці вызначаецца напружанасцю. Таму ўсім міралюбным сілам трэба быць асабліва пільнымі, сабранымі і гатовымі да рэагавання на самыя нечаканыя выклікі і пагрозы", - заявіў Прэзідэнт.
Паводле слоў кіраўніка дзяржавы, выдатная боегатоўнасць, вывучка і аснашчанасць узброеных сіл, узаемаразуменне і ваеннае братэрства саюзнікаў і партнёраў з'яўляюцца самай надзейнай гарантыяй бяспекі краін.
"Армейскія гульні сабралі разам ваеннаслужачых з многіх дзяржаў. Гэта лепшыя з лепшых, хто па праву лічыцца элітай узброеных сіл. Кожны з вас прайшоў нялёгкі шлях адбору, вытрымаў сапраўды сур'ёзныя выпрабаванні. Як і ў спорце, менавіта дзякуючы сіле духу, выдатнай падрыхтоўцы і мэтанакіраванасці вы сёння тут. Вам выпаў высокі гонар прадстаўляць сваю краіну на міжнародных спаборніцтвах, дэманстраваць баявую вывучку, тактычнае майстэрства, уменне дзейнічаць дакладна і зладжана. Ва ўсіх сферах цэніцца прафесійнае майстэрства. Але асабліва неабходна гэта якасць у высакароднай справе абароны Айчыны", - адзначыў беларускі лідар.
Аляксандр Лукашэнка ўпэўнены, што гульні паслужаць для ваеннаслужачых добрай школай, дадуць магчымасць абмяняцца практычным вопытам і ваеннымі ведамі". "А ў непрыяцеляў надоўга адаб'е жаданне разглядаць нас праз зброевы прыцэл. Няхай і ў далейшым воіны нашых армій сустракаюцца менавіта на такіх спаборніцтвах, а іх геаграфія максімальна пашыраецца, далучаючы новыя краіны і кантыненты. Такія мерапрыемствы служаць вялікай мэце - падтрыманню міру і бяспекі", - сказаў Прэзідэнт.
Кіраўнік дзяржавы пажадаў усім удзельнікам Армейскіх міжнародных гульняў поспехаў і высокіх рэзультатаў у спаборніцтвах, а роднай беларускай камандзе - яркіх і пераканаўчых перамог.-0-
